Ich Nichlas der Drotlawf zu den zeiten obrister Spitalmaister der puerger Spital ze Wienne. Vergich und Tuen chunt allen den die disen brief lesent oder hoerent lesen daz ich von dez gepots wegen so der Edel hochgeborn fuerst Hertzog Ruedolf von Oesterreich selig in der Stat ze Wienn umb gruntrechts ablosung gepoten und aufgesatzt hat, Recht und redleichen an dez egenanten Spitals stat abzeloesen geben han, Weicharten dem Entzeinstorffer von Weizzenpach und seinen erben, ein halb phunt wienner phenning gelts gruntrechts, die dasselb Spital gehabt hat auf irm haws gelegen in dem Lederhof, an dez Hertzogen hof ze Wienne, ze nêchst Fridreichs haws von Anger, umb vier phunt wienner phenning, der si mich an dez egenanten Spitals stat gar gewert habent. also daz er und sein Erben und alle die die daz vorgenant ir haws nach In inne habent und besitzent, dez egenanten halben phunt gelts grundrechts sullen fuerbaz, ewichleichen darab ledich und vrey sein, und daz davon nicht mer ze dienen. Und sol auch ich, noch mein nach-koemen, die dez vorgenanten Spitals nach mir Spitalmaister oder verweser werdent, noch ander niemant von desselben Spital wegen auf daz vorgenant ir haws umb daz egenant halb phunt gelts gruntrechts, fuerbaz nimmermer chain ansprach noch chain vodrung haben noch gewinnen weder nil noch wenich. Wer aber daz fuerbaz icht brief oder urchund fuerpracht wuerden, von wem daz wêr, die auf daz vorgenant ir haws, umb daz egenant halb phunt gelts gruntrechts sagten, die-selben brief und urchund sullen denne gêntzleichen, allerding tod und ze nicht sein, und chain chraft mer haben weder chlain noch groez. Und dez ze einem urchund und ze einem gezewg gib ich In disen brief versigelten mit dez vorgenanten Spitals anhangundem Insigil Der brief brief (sic!) ist geben ze Wienne nach Christes gepuerd dreutzehen hundert jar darnach in dem sechs und sechtzgisten jar des nêchsten Eritags nach sand Ulreichs tag.

Source Fulltext: Peter Peusquens