Wir Albrecht von gotes gnaden, Hertzog ze Oesterreich, ze Steyr, ze Kernden, und ze Krain, Graf ze Tyrol etc. Embieten unsern getrewn .. allen Gruntherren, und Gruntfrawn, Perchherren, und Perchfrown, sie sein geistlich, oder weltlich, den dieser brief gezaigt wirt, unser gnad, und allez guot. Wand wir aygenlich und wol, beweiset sein, daz land und lewt, nicht versorgt, noch in nutz, noch fueglich sei, Swenn ir in die chaufbrief, oder satzbrief, oder in ander brief, daran ewr Insigel gehoert, schreibet, oder schreiben haizzet, ew an schaden. Gebieten wir ew, gar ernstlich, und wellen bey unsern hulden, daz ir fuerbas, davon lazzet, und ew, mit ewern Insigeln verschreibet, und schreiben haizzet, alz ez, von alter herchomen ist, und chain neuung daran machet, oder ir têtet groeslich und swêrlich wider uns, und wolten ouch wir ew, darumb, sere pezzern, an leib, und an guot. Geben ze Wienn, an freitag nach unsrer frowen tag ze herbst. Anno domini Millesimo Trecentesimo, Sexagesimosexto. Marschalcus provincialis (de Stadeckh)

Source Fulltext: Peter Peusquens: siehe auch: Tomaschek, Rechte und Freiheiten I, S.162 no 70