Ich Nyclas von Manswerd der prister vergich und Tun chund allen den die disen brif lesent oder horent lesen die nu lebent und her nach chunftig sind um die ewig Messe zu unser frowen chap-pellen auf der Stete zu Wyenn dew mir der erber man Jans von der Heiligenstat Puerger zu Wyenn verlichen hat Nu verpind ich mich mit disem gegenburtigem briff daz ich alle tag schol gen zu aller Tagzeit alz ander Chappellan und der chapellen da selbes gewanhait ist und ob ich des nicht Entêt daz tzwen Erber Mann mit iren Trewen gesprechen moechten an alles geferde So schol der vorgenant Jans von der Heiligenstat oder der pharrer da selbes oder wer nach seinem Tod der egena(n)ten messe lechenher ist die selben messe leichen einem andrem priester wem in daz aller pest fuegend ist und schol ich sew nyndert dar an yrren weder mit worten noch mit weri-chen noch mit chainer lay ding daz Irrung gehaissen mag und wenn ich nicht aygens Insigels han So verpind ich mich mit meinen Trewen under der erbern Leut Insigel meiner vettern Rugers des Duringens und Durings seines pruders datz Nuzdorf die die (sic!) diser sach getzeuge sind. Der brif ist gegeben ze Wyenn Nach christes gepuerd drewtzehen hundert jar dar nach in dem Syben und Sechtzigisten jar an unsers herren Leichnams Tag.

Source Fulltext: Peter Peusquens