Ich Michel der Vierdung ze den zeiten Statrichter ze Wienn vergich offenlich an dem brief, daz fuer mich cham in die purgêrschrann ze Wyenn do ich sas an offem Gericht, der erbêr priester her Niclas ze den zeiten Chappellan. der Ewigen messe, die her Seyfrid der Reicholff sêlig in uenser vrowen Chappellen. in der Purger Rat haws ze Wienn gewidempt und gestifft hat, und chlagt mit vorsprechen, auf den Drittail des hawses. der weilnt des egenanten hern Seyfrids des Reicholffs gewesen wêr, gelegen in der hindern pekchenstrazz. ze Wienn. ze naest mein obgenanten. Michels haus des vierdungs. umb fuemf phunt wienner phenning gelts versezzens puerchrechtes und umb alle die zwispil die mit recht dar auf ertailt und gegangen sind, als verre, uentz das ich im mit recht poten dar auf gab, Otten den Schaur und Jannsen von Veltzperg. die zwen vor-sprechen. di habent auch paid darumb gesagt mit iren trewen var offem Gericht als si ze recht suellen. daz si denselben drittail des hauses mitsampt den umbsêtzen haben beschawt und geschatzt, das der so tewer nicht minst als das versezzen puerchrecht und die zwispil die mit recht dar auf ertailt und gegangen sind. und darnach ward gevragt was recht wêr, Do geviel dem egenanten hern Niclasen mit vrag und mit urtail. er solt mier mein recht geben daz hat er getan. und solt ich in desselben drittail desselben hawses gewaltig machen und an die gewer setzen. daz han ich auch getan. also, daz er und all sein nachchomen, Chappellan der egenanten Ewigen messe den obgenanten Drittail des hawses sullen fuerbas ledichleich und freilichen. haben. und derselben ewigen messe frumen damit ze schaffen verchauffen versetzen. und geben. swem si wellen als es derselben ewigen messe aller pest wol chom und fueg an allen chrieg und irresal. Und solt ich in des mein uerchund geben. Und des ze uerchund so gib ich in den prief.versigelt mit meinem Insigel. Der prief ist geben ze Wienn nach Christi gepuerd Drewtzehenhundert jar, darnach in dem zwai und Sybentzigistem jar, des nasten Mantags nach sand Mathie Tag, des heiligen zwelifpoten.

Source Fulltext: Peter Peusquens