Wir Albrecht von gotes gnaden Hertzog ze Oesterreich ze Steyr ze Kernden und ze Krain, Graf ze Tyrol etc. Tuon kunt, daz die erbern unser getrewn und sunderlieben .. die Purger .. der Richter und .. der Rat der Stat ze Wyenn, von der Steur, die uns von In gevallen sol, auf den nêchsten sand Merten tag in dem gegenwurtigen zway und sibentzgisten iare, fuer uns und an unser stat, die edeln und erbern, Bruoder Rued(olf) von Honburg Teutsches Ordens weilent Lantcomendur ze Behein, Phaffhaimer Burkhard, Chuonrad, und Albert von Honburg geprueder, verricht und gewêrt habent sechshundert phunt, zway und zwaintzig phunt, sechs schilling, und zwelf wienner phenning, die wir denselben von Honburg schuldig waren, und sagen wir fuer uns, und unsern lieben Bruoder Hertzog Leuppolt die egenanten unser Burger, derselben summ phenning, an der vorgenanten steur des gegenwurtigen zway und sibentzgisten iars, gêntzlich ledig und loz Mit urchund ditz briefs Geben ze Wyenn an Samztag vor sand Martins tag. Anno domini Millesimo CCCmo LXX secundo. dominus dux per se. Jo. de Tierna

Source Fulltext: Peter Peusquens