Wier Albrecht von gots gnaden, Hertzog ze Oesterreich, ze Steyr, ze Kernden und ze Krain, Graf ze Tyrol etc. Bekennen, und tuon kunt, offenlich mit disem brief, daz wier, unsern getrewn .. den Chauflêuten ze Wienn, durch ierr vleizziger pett willen, erlaubt haben, und erlauben auch mit disem brief, daz si von yeklichem wagen, der kaufmanschaft fueret, wên, oder welhe, der, ange-hoeret, die hin in, gen Venedy, oder her auz gent, zwen, und dreizzig wienner phenning, nemen sullen und von ainem vardel, sechs phenning, untz an unser, oder unsers lieben bruoders Hertzog Leupolts widerrueffen, und swas gelieb also, da von gevallen, das sol der Gewinn unsrer egenan-ten choufluten ze Wienn, ze nutz komen, und ze furderung irer sache gentzlich bekeret werden, ane widerred und geverd. Davon gepieten wir ernstlich unsern amptluten und undertanen, den diser brief gezaigt wirt, und wellen, daz si die vorgenanten unser chauflute, bey derselben unsrr gnad, und disem urlaub beleiben lazzen, und dawider nicht tuon, in dehainen weg, alle die weil, und die, nicht widerrueft ist, als vorgeschriben stet. Mit urkund ditz briefs. Geben ze Wienn, an sand Mathias abent, des zwelifbotten. Nach Kristes gepurd, drewtzehenhundert iaren, darnach in dem drey und sybentzgisten iare.

Source Fulltext: Peter Peusquens