Pilgrimus dei gratia sancte Salzburgensis Ecclesie Archiepiscopus, apostolice Sedis Legatus. Universis sancte matris Ecclesie filiis. Salutem in omnium Salvatore. Quamvis piorum profectibus locorum et commodis, ex officii nostri debito, vacare atque intendere teneamur, magis tamen obnixi illis volumus esse locis, in quibus gloriosa virgo omnipotentis dei genitrix illibata, precipua est patrona, que ymnis, choris, laudumque preconiis, per cuncta mundi elymata, omnibus est merito preferenda. Nos igitur cupientes christi fideles, quibusdam muneribus illectivis, indulgen-tiis videlicet et peccatorum remissionibus, ad pietatis opera invitare, quo divine reddantur gracie aptiores. Omnibus vere penitentibus et confessis, qui Capellam beate virginis in domo Ottenhaim Wienne Pataviensis diocesis, in subscriptis festivitatibus, Nativitatis, Circumcisionis, Epiphanie, Resurrectionis, et Ascensionis domini, Penthecostes, sancte Trinitatis, Corporis Christi, et earum Octavis, necnon quinque sollemnitatibus beate Marie virginis, sancti Johannis baptiste, sanctorum Petri et Pauli, ac aliorum apostolorum, dedicationis ipsius Capelle, ac singulis diebus dominicis et festivis, devote visitaverint, ibique deo, et Sanctis eius sua vota persolverint, de omnipotentis dei misericordia et beatorum Petri et Pauli apostolorum eius, confisi suffragiis, quadraginta dies, de iniunctis sibi penitenciis, misericorditer in domino relaxamus, perpetuis temporibus duraturas. Datum Wienne Mensis Junii die sexta . Anno domini Millesimo Trecentesimo Septuagesimo septimo.

Source Fulltext: Peter Peusquens