Ich Swêster Vrawemuet zue den zeiten Priorin der Geistlichen vrowenchloster ze Maernberkch, und wier der Convent gemain daselbz vergehen offennlich mit dem brief umb das haws gelegen in sande Johannstrazze ze nêchst maister Chunratz haus. daz vrowe Kathrei Hainreichs seligen witiben des Chewschen, des Pharrer mueter von Sultz. dem ouch Got genad. Geschafft hat. uens..dem Pharrêr von Intzestôrff, und dem Sneyder irer swester suen ze Intzestorff, iegleichem aînen drîttaîl desselben hawses. als daz selb geschêfft zue einer gedêchtnuzze in der Statpuch geschriben stet. Nue ist daz vorgenant haus verchoufft Hainreich, dem Eysner, und seinen erben, umb acht und zwaintzig phunt, wienner phenning, der uens zue unserm tail gevallen sind. Newn phunt und achzig phenning, alles wienner muenzze, und. darumb so haben wier uens mit Guetem willen und mit wolbedachtem muet, mit gemainem veraintem Rat unsers Convents zue der zeit da wier ez wol getuen moechten. des vorgenanten haws, und aller der rechten, die wîr daran gehabt haben, oder furbas gehabt haben moechten. gar und gentzlich vertzigen und fuertzicht getan. und vertzeichen ouch uens, dez mit dem brief Also daz wier noch unser nachkomen noch anders yemant von unsern wegen, in dheinen sachen wie die genant sein. darauf fuerbaz nimmer mer dhein ansprach, kriege recht noch voderueng, haben noch gewinnen suellen, weder vil noch wenig. Mit urkunde ditz briefs. besigilt mit mein obgenanten Swester Vrawemuet, und mit dez Convents baiden anhangunden Insigeln. Der brief ist Geben, nach Kristes gepuert, dreutzehen-hundert iar, darnach in dem Siben und Sibentzgistem iar, dez nêchsten Samptztags. nach sand Cholmanns Tage.

Source Fulltext: Peter Peusquens