Wir Leupolt von gots gnaden Hertzog ze Oesterrich ze Steyr ze Kernden und ze Krain Graf ze Tyrol etc. Tun kunt umb das geschaeft daz weilent Lienhart der Poll unser purger ze Wienn, recht und redlich getan hat, zue den zeiten do er das wol getuen mocht, und das er auzzerichten und ze volfueren empholhen hat dem erbern unserm lieben andechtigen Jacoben Pollen pharrer ze Ottenhaim, und unserm getrewen Pauln Holtzkeuffel zue den zeiten purgermaister und Niclasen von der Schebnitz purger ze Wienn. daz wir dasselb geschaeft und den brief der darueber gege-ben ist, bestêtt haben und bestêtten in auch wizzentlich, mit allen puenten und artikeln die darinne verschriben und begriffen sind, und wellen auch ernstlich Swas die vorgenanten drey geschêftherren von desselben geschefts wegen geordent und gegeben habent und fuerbazzer ordnen und geben werden, es sey vil oder luetzel, wem oder an welich stette, daz es dabey beleibe und staet gehalten werde an all widerrede, und daz si auch darumb fuerbazzer niemant ze antwurten haben, weder mit gericht noch ane gericht sunder daz der geschêftbrief und auch ir ordnung und auzrichtung staet und vest beleibe an alles geverd und ane argen list. Mit urkunt ditz briefs. Geben ze Wienn an Samztag vor sand Thomas tag des hailigen zwelfbotten Nach Kristi gepuert dreutzehenhundert jar, darnach in dem Siben und Sibentzigistem jare.

Source Fulltext: Peter Peusquens