Wir. Hainreich. und. Chuonrat, vetern Grafen von Schounberch. wir veriehen Offenleich. an disem prief und tuon chunt allen den die in an sehent oder hoerent lesen. daz wir dem getriwem Otten von Liechtenwinkchel. und seiner hausvrowen, und ir paider Erben die si mit ein ander habent. oder noch mit ein ander gewinnent. durch ergoetzung. umb Liechtenwinkchel. und umb alle sache swie die genant ist. die sie hintz uns zesprechen heten. geluobt haben. Cehen phunt geltes zeleihen. swie oder swoe uns das ledig wirt. ze aintzingen oder mit ein ander. untzen si der Cehen phunt geltes gaentzleich. ze envollen choment an allez gevaer. und over daz uns icht ledig wuorde. und daz wir daz anderswoe hin lihen. und in nicht. swoe sich des der vorgenannte Otte. und sein hausvrowe und ir paider erben mit einer rechten und woren gewissen erfueren. und daz si uns des mit einer gewissen beweisent und ermoent. so suollen wir in an gevaer. auoz unserm uorbor. Cehen phunt geltes leihen. und die schuollen si als lange inne haben. untzen wir in die Cehen phunt geltes leihen und richtige machen. als vor geschriben ist. wir beichen auch daz wir in irer Chinde aines bestatten und beraten schuellen aeintweder in einen Orden. oder mit einer goetsgabe. Die uns ledig wiert. nach den die unser prief vor umb gotsgabe von uns habent. an allez gevaer. und daz wir in daz also staet und unzerbrochen behalten. dar ueber ze einem urchunde gebn wir in disen prief mit unser paider anhangenden Insigeln. besigelten. und ist daz geschehen. an dem Sunewent abent. du man zalt von Christes gepuertt dreutzehen hundert jar. und dar nach in dem fuemf und zwaintzgistem jare.

Source Fulltext: Peter Peusquens