Ich Margret Symanns hausvrowe von Chuernbach die weiln den Muerraten Jannsen, dem got genade, gehabt hat, und ich Anna ier tochter bey demselben Jannsen, des chlainen Jekleins hawsvrowe. Wir vergehen fuer uns und fuer unser erben und tun chunt offennleich mit dem brief. Das uns die erbern weisen hern Pillgreim der Snêtzel die zeit des Rats der Stat ze Wienne, und her Paul der Holtzchaewffel, baide auzrichter und verweser des Gruntinsigils der Stat ze Wienne, gar und gentzleich verrichtet und bezalt habent, der zwaintzig phunt und achtzehn phenning wienner Muenzze die man mir egenanten Margreten von meins erern wirts wegen zue leibgeding angelegt solt haben und der mein tochter die vorgenant Anna nach meinem tode wartund gewesen wêr. Und sagen auch si der egenanten phenning gar und gentzleich ledig und loz von aller ansprach . Mit urchund ditz briefs besigilt mit der zwaier erbern mann aufgedrukchten Insigil hern Michels des Newer und des egenanten Simans von Chuernbach baide purger ze Wienne, die der sache getzeug sind mit irn Insigiln. Und wann wir selber nicht aigner Insigil haben so verpind wir uns mit unsern trewen uender die vorgeschriben Insigil alles das stêt ze haben das vor an dem brief geschriben stet. Der geben ist an Eritag nach sand Merteins tage, anno LXXXmo.

Source Fulltext: Peter Peusquens