Ich Peter Piber von Weinperg vergich offenlich vnd tuen kundt allen den, die nun lebent vnd den, die hernach ku^enfftig werdent, di diss handtuest geschriben ansehent oder horn lesen, das ich mit verdachtem muet vnd gesambtem rat frawn Perichten meiner hausfrawen vnd mit aller vnnser beder freundt vnd erben guetlichem willen meins freyen Erbaigenns den hof datz Stafflern verkaufft han mit alle dev vnd darzu geho^ert versuecht vnd vnuersuecht vnd mit alle dem recht, als ich in vnd mein vodern Ennher pracht haben jn Rechter aigens gwer dem Gotshaws vnd der Samnung datz Pawngartenperg vmb vier phund vnd vmb hundert phund phenning Wiener mu^enss, der jch vnd mein Erben recht vnd redlich gewert sein, Vnd han ich derselben phenning mier vnd denselben meinen erben angelegt fünffundfunfftzig phund an annder aigen an recht Rent datz heilingstain vnd an ein fleischpanckh datz der Freyenstat, die wir in nutz vnd in gwer haben. Vnd bin ich vnd all mein Erben des vor genannten hof datz Stafflarn des vor genannten gotshawss vnd der Samnung Scherm vnd Gwer nach lanndsrecht, wo (in) des not geschieht. Vnd wo derselb hof von yeman ansprechlich wurd, das sol jch vnd mein Erben dem gotshaws ausrichten an alles verziehn vnd was der vor benannten Sammung daran abgieng, das sullen sy haben auf alle dem vnd ich vnd mein erben all habent in dem lant datz o^esterreich versuecht vnd vnuersuecht. Das dise red sta^et hinfu^erbas vnd vnzerbrochen beleib, darüber gib ich dem vorgenannten gotshaws vnd der Samnung disen brief bestetigt mit meins herrn Innsigell hern Jannsen von Cappelln, der obrister landtrichter jn dem Machlannd ist, vnd mit mein selbs Innsigel vnd mit mein ohaims Innsigel Fridreichs von leidem zu einer ewigen Vrchund. Des sind gezewgen her Marquart von osterwerch, her hertneid von Chuleub, her Chunrad von Vlachenneckh, her Vreitl von winthag, her Marquart von o^ed, her Chunradt von Mitterberch, her Ott vnd Chunrad vnd Vlrich die hawser, Weichart der Lanndtrichter, hainreich von Ymtzing, Wetzl von Erwing, Chunradt, Tamquart die lempl vnd darzue annder pidberleut genueg, den dise red kundt ist. Das ist geschehen vnd ist diser brief darüber gegeben, do von Crists geburd erganngen waren drewtzehen hundert Jar, darnach in dem funfftzehenden Jar ze Weichnachten jn den feyrtagenn.

Source Fulltext: OÖUB 5 (Wien 1868) S. 138-139, Nr. 138