Ich Christan der Drvchsoezze von Lengenpach vergich vnd tvn chvnt allen den, die disen prief lesent oder horent lesen, Die nv lebent vnd hernach chvnftich sint, Daz ich meinem herren dem apt von Pavmgartenperge vnd der Samnvnge da selbens daz gelobt han , daz ich pei in wil bleiben, und han jn gelvbt ze geben zehen phvnt wienner phenninge geltes in dem Obern ampt datz Aentzeinspach, dar vmb daz der Samnvnge ze Pavmgartenperge aine besvnder gnade geschech, die ewich sol sein, vnd swanne ich in die vorgenanten zehen phvnt wienner phenning geltes auz zaige, so svln sie mir irn prief geben, swaz der vorgenanten samnvnge ze pavmgartenperge von meiner wegen beschaiden wirt, daz sie daz staet haben, vnd gib jn dar vber disen prief ze ainem offen vrchvnde vnd ze ainem waren gezevge diser sache versigilten mit meinem jnsigil vnd mit meines sweher jnsigil hern Otten von zelkinge. Diser prief ist geben ze wienne, do von Christes geburt waren ergangen drevzehen hvndert jar, jn dem fvnfzehenten jare darnach des eritages in der andern wochen nach phingisten.

Source Fulltext: OÖUB 5 (Wien 1868) S. 146, Nr. 148