Ich Vlrich der Hawser tu^en kundt allen den, die nun sind, vnd den, die hernach ku^enfftig werden, die disen brief sehennd oder ho^erent lesen, das ich gegeben han vmb einen widerwechsel dem Abbt vnd der Samnung datz Pawngartennperg meins Rechten Aigen ain hueb, die haist an dem Mo^erthof, die dient Su^ebn schilling phenning vnd ein hofstat datz Mitterchirchen, die diennt Viertzig phenning vnd klains dienst, mit alle dev vnd zu in baiden geho^ert versuecht vnd vnuersuecht Vnd sol auch ich desselben gu^ets desselben Abbts vnd seiner Samnung gwer sein nach lanndtrecht; dawider hat mir der Abbt vnd die Samnung gegeben datz hurnpach ein hu^eb vnd ein hofstat, die dienent baid ein phund phenning. Vnd dasselh aign datz hurnpach han ich nach meinem tod dem Abbt vnd der Samnung datz Pawngartennperg hinwider geschaft zu einem Seelgere\at mir vnd meiner hausfrawen frawn Chunigunden von Luffenwerch, der got genad, also, das man vnnser baider jartag datz dem vor genannten Closter sol begenn alle iar an einem tag Vnd wer desselben chloster phleger ist, der sol der Samnung an demselben Jartag von demselben phund gelts datz hurnpach ein dienst gebn, als gewonlich ist. Wa^er aber getan, das ich erbenn gewinn, wolten dieselben erben dasselb gu°t datz hu^ernpach gern haben, so sullen Sy gebenn jn dem Machlannd dem closter ein als gu^et phund gelts, als ditz ist, vnd sullen auch daran chain widerred haben. Vnd das dise Red sta^et vnd vnzerprochen beleib, so gib ich dem vor genannten closter dise hanndtuesst versigelt mit meinem Innsigel zu einem ewigen Vrchundt. Des sind gezewg her Marquart von Osterwerch, her Chunrat von Vlachennegkh, her hartneit von Chuleub, her Vreitel von Winthag, her Ott der hawser vnd her chunrat mein baid brüeder, herwort der Frey, hainreich der Fleischess, herweich der holtzer, hainreich der Imptzinger vnd darzu manig pidber man. Der brief ist gegeben, do von Crists geburd erganngen waren drewtzehen hundert Jar, darnach in dem Sechtzehennden Jar an Vnnser frawentag zu der liechtmess.

Source Fulltext: OÖUB 5 (Wien 1868) S. 158-159, Nr. 160