Ich Georg von herstorf vergich vnd tuen kundt allen den, die disen brief ansehent oder horen lesen, die nun sind vnd hernach kunfftig werdennt, das ich zu der Zeit, da ich das wol getuen macht, mit wol bedachtem muet vnd mit gesambten Rat frawn Margreten meiner hausfrawn vnd mit aller vnnser beder erben guetlichem wille vnd verhennknuss vnuersprochenlichen meins Rechten freyen kaufaigens durch got vnd ab meiner vnd der vorgenannten frawn Margreten meiner hausfrawen vnd durch aller vnnser vodern peder Seel wille vnd auch zu einer ablegung allen, den ich schuldig bin abzelegen, der ich nicht finden mag, als ich gern tet vnd auch von Recht solt, han lediclich nach peichtiger Rat zu einem steten vnd ewigen Seelgerêt gegeben drey hofsteet an dem Chrainperg, der zehenn Schilling gelts ist, vnd dient man die halb zu Weichnachten vnd halb an Sannd Go^ergenntag, mit alle dem vnd zu jn geho^ert, versuecht vnd vnuersuecht dem Gotzhaws vnd der Samnung hintz Pawngartennperg, da ich vnd die vor genant mein hausfraw frawn Margret erwelt haben, ze ligen mit vnserm todpett, wann got v^eber vns gepewtt. Vnd bin auch ich vnd all mein Erben derselben dreyer hofsteet des vor genannten Gotshauss vnd der Samnung Scherm vnd Gwer nach Landsrecht, vnd das ist geschehen mit sogtaner beschaidenhait, das denselben gellt die zehen Schilling sol einnemen Ewigclich, wer das Pitanntzambt jnnen hat, vnnd sol dauon geben, dieweil wir bede leben, alle Freitag der Samnung in das Refennt zehen phenning zu annder dem Seelgeret, das Sy Ee des freitags gehabt habent, vmb Visch, vnd darumb sol vnnser beder gehugnus jerlich von der Samnung beganngen werden, die weil wir leben des nagsten tags nach dem lessten Vnnser frauentag in dem herbst, als gewonhait in grabm orden ist. Dann nach vnnserm tod sol vns von demselben Seelgeret ein benannter Jartag besunderlichen begangen, werden, an welichem tag das der Samnung aller besst fuegt. Vnd sol der Pitanntzer der Samnung an demselben tag einen Vollen dienst geben in das Refennt als gewonlich ist. Vnd wo desselben gescheffts icht abgieng bey vnnsern lebentigen Zeiten oder nach vnnserm tod, so sol ich mich oder mein nagst erben, ob ich nicht enpin, ze hant wider ziehen zu demselben aigenn vnd mich des vndterwinden alslanng, vntz das die Saumchait mit der gwissen der Samnung wol gepessert werd Nach meinem willen vnd nach der Samnung notturfft. Darüber das ditz geschefft dem Gotzhaws vnd mir vnd meinen Erben stet vnd vnzebrochen beleib, Gib ich dem vor genannten Conuent disen brief zu einem ewigen vnd zu einem waren Vrchundt bestetigt mit meinem Insigel. Des sind gezewg her Chunrat zu den Zeiten Burggraue datz Sewsenneckh, her Walther vnd Jans sein Sun, her Alram von Reichkerstorf, her Weichart von Pernaw, her Walther von Meileinstorf, Pernhart vnd hainreich die Jesenntzer, Wolfhart der Gull, Albrecht sein brueder, Chunrat von Awrah, Chuenrat von Puechaw, Hainreich wetzel, Jacob Vierck, Vlreich der Schreiber, Chunrat Sunthaim, Herman vnd Marquart Eysenhoven vnd darzu annder Erber lewt genueg. Das ist geschehen vnd ist der brief gegeben, do von Crists geburd erganngen waren drewtzehen hundert Jar, darnach in dem Zway vnd dreissigisten Jar an Vnnser Frauentag zu der Schidung.

Source Fulltext: OÖUB 6 (Wien 1872) S. 73f., Nr. 64