Ich Hadmar der Volkenstorfer, Hem Ottens sun von chreutzen. Vergich vnd tun chunt allen den di disen prief sehent lesent oder hornt lesen, di nu sint oder hernach chunftig werdent, Daz ich mit verdachten mu°t vnd Jansens meins suns vnd aller meiner Erben gutleichem willen meins freyn aigens ainen hof, der leit ze teuffenpach vnd haizzet der widerhof vnd dient an sand gilgentag ain phunt nevwer phenning winner munzz vnd sechs hu^ener vnd an sand Gorgentag sechs schilling winner phenning, als dan ir leuf ist, Gegeben han, do ich daz wol tun macht, dem Abbt vnd der Samnung datz Paumgartenperg ze einem ewigen selgeraet mier vnd allen meinen vodern mit alle diu vnd darzue gehort ze dorf ze veld vnd mit alle dem recht, vnd ich in vnd mein vadern gehabt habent, versucht vnd vnuersu^echt an alles geverd vnd pin ich vnd alle mein Erben des vorgenanten Abbts vnd der samnung datz Paumgartenperg scherm vnd gewer nach lantz recht, wo in des durft geschicht, Also beschaidenlich, datz nach meinem Tot schol der Abbt, oder wer des Gotshaus ze paumgartenperg di weil phleger ist, an meinem jartag einen vollen dinst der Samnung des vorgenanten Gotshaus geben prat, wein vnd visch, als gewonhait ist in grawem orden, vnd wann daz verzogen wurt an recht Ehaft nat, so schullen sich mein naechst erben vnderwinden dez Egenanten gu°tz vnd schuln iz als lang inn haben, vntz daz di saumchait wol werd gepezzert, vnd schol dann wider vnser sein als vns vor geschriben ist. Vnd dar vmb, daz daz selgeret ewichlich von mir vnd von allen meinen Erben beleib, gib ich hadmar der volkenstorfer dem Abbt vnd der Samnung datz Paumgartenperg Disen prief versigelten mit meinem jnsigel vnd meines suns Jansens anhangunden jnsigel ze einem ewigen vnd vnzebrochen vrchund diser sach, Daz ist geschehen, do von Christus gepurd ergangen sint, Dreutzehenhundert jar dar nach in dem fumphvndreizgistem jar, an sand Benedictentag.

Source Fulltext: OÖUB 6 (Wien 1872) S. 152f., Nr. 147