Ich Janns von Cappelln vergich offenwar vnd tu^en kundt allen den, die den brief sehent oder horent lesen, daz ich mit wol bedachtem muet vnd mit guetleichem willen aller meiner erben geben han hintz Pawngartenperg meins rechten freyen aigens ainen hof gelegen pey der Aist, haist der Mitterhof, mit allen den rechten vnd nutzen, die darzu geho^erent, versuecht vnd vnuersuecht, als ich in selb emaln gehabt han in stiller aigens gwer meiner jarenuollen, vnd desselben hofs ist vierthalb pfund gelts, mit also beschaidner red, daz sy dieselben phenning geben sullen auf meines vatter jartag zu dem anderen gelt, das ich darzu gewidemt han mit vrchundt der hanndtuesst. Ich bin auch vnd mein erben des vor genannten hofs der herren vnd des gotshauss scherm vnd gwer fu^er all ansprach, wo in des durft geschiecht, nach lannds recht in O^esterreich. Vnd darumb, das die red sta^et vnd vnuerkert beleib, daruber gib ich in den brief versigelten mit meinem anhangunden jnnsigel. Der brief ist geben nach Christs geburd drewtzehen hundert jar vnd darnach in dem newn vnd viertzigisten jar an sannd Jacobs tag des zwelfpoten.

Source Fulltext: OÖUB 7 (Wien 1876) S. 113f., Nr. 115