Ich Chunrat von Ymtzing vergich offenwar vnd tuen kundt allen den, di disen brief sehent oder ho^erent lesen, das mein vatter Hainrich der Ymtzinger, dem Got genad, geben hat mit wol bedachtem muet vnd mit guetlichem willen aller seiner erben, wie die genant sind, ze der zeit, do er es wol getuen mocht, hintz Pawngartennperg seines rechten freyen aigenn ain hoffstat datz Gang, die dient ierlich ein halb phundt wiener phenning auf sand Michelstag, jiem vnd all sein vodern zu einem ewigen seelgera^et also beschaidennlich, das die herrendauon kain stewr noch kain vnrechte vodrung nemen sullen, dann wann man di hofstat mit ainem newen holden stifft, so geit der ditz (auz) vert sechs, vnd der einfert sechs (pfenning?) Vnd wer der herren pitantzer ist, der sol das halb phund einnemen vnd sol der samnung dauon ein dienst geben in das refennt an aller heiling abend, vnd sullen die herren an demselben tag meins vatter jartag begeen, als gewohnhait ist in jrem orden. Wer aber, das man verzug vnd den herrn den dienst nit geb, als verr das halb phund geraicheh mag vnd als ee verschriben ist, so sullen sich mens vatters nagst erben wider vndterziehen der hofstat vnd sullen die jnnhaben so lanng, vntz das die sawmchait wol gepessert wirt, so ist dann den herrn vnd dem gotshaws die egenannt hofstat wider ledig an allen krieg als vor. Vnd darumb, das die red stet vnd vnuerchert beleib, gib ich an meins vatter stat, dem Got genad, den brief versigelten (mit) meinem anhangunden innsigell vnd mit meines vettern innsigel Otten des Ymtzinger, der der sach damit gezewg ist. Der brief ist geben nach Christs burd drewtzehen hundert jar, darnach in dem ains vnd funftzigisten jar and sand Ayten tag.

Source Fulltext: OÖUB 7 (Wien 1876) S. 226f., Nr. 224