Wir abpt Christan ze Pavmgartenberg vnd der conuent da selben veriehen offenleich vnd tu^en chunt allen den di den prief sehent oder hörnt lesen, daz vns der erber schreyber Rapoto von Wienn hat geben zwaintzk phvnt wienner phenning, vmb die wier chauft haben ain lehen ze Weysching gelegen in Mitterchirchen pharr, daz zehen schilling herren gult ist, also beschaidenleich: wer gvster ist, daz der daz selb lehen inn schol haben, vnd schol dovon raichen ain nacht liecht zv sand Benedicti alter vnd ain stekch chertzen zu der, vnd er ee von alter dahin geben hat, vnd ain wandlung chertzen, vnd all hochzeit wann man offenez capitel hat, so schol er daz liecht datz sand Benedicten alter des abents ze vesperzeit avf zvnten vnd schol daz lazzen prinn di acht tag auz gantz vnd gar nacht vnd tag dem vor genanten Rapoten vnd all seinen vodern ze ainem ewigen selgeraet. Mit vrchund des priefs, den wier versigelt haben mit vnsern paiden jnsigeln. Geben nach Christs pvrd drevtzehen hvndert jar in dem drev vnd fvmftzkistem jar des vreitags in der ersten vastwochen.

Source Fulltext: OÖUB 7 (Wien 1876) S. 298, Nr. 293