Wir Albrecht von Gots gnaden hertzog ze Osterreich, ze Steyr vnd ze Kernden tuenn chunt, daz vnser getrewer lieber Johans von Chappell die lehenschaft vnd alle die recht so er gehabt hat zv der kirichen ze Gumpendorf, gebn hat loutterlich durch Got fur sich vnd fur sein erben dem gotshous ze Paungartnperig ewichlich ze haben also beschaidenlich, daz demselben Johansen von Chappell vnd seinn erben die vogtey vber diselben kyrichen ze Gumpendorf dann och ewichlich sol beleiben. Ouch sullen die geistlichen leut der abt vnd der conuent ze Paungartenperig dem egenanten von Chappell vnd seinen erben den gotsdienst gentzlich volfuern, des si sich mit irn briefen gen in verpunden habent. Teten si des nicht vnd wurden daran sovmig, so sullen sich der ebenant Chappeller vnd sein erben der selben kyrichen ze Gumpendorf wider vndercziehen mit vnserm vnd vnserr erben guetem willen an alle irrung. Vnd wann wir obrister vogt sein in dem land ze Osterreich, batt vns der egeschriben Chappeller mit vleizz, daz wir daz bestetten vnd im des gundêten, daz haben wir getan vnd tuen ez ouch mit vrehund dits briefs besigelt mit vnserm Insigel. Geben ze Wienn an sand Ruepprechts tag in der vasten nach Christ gepurd dreutzehenhundert jar, darnach in dem vier vnd fumfczkisten jar.

Source Fulltext: OÖUB 7 (Wien 1876) S. 360f., Nr. 349