Ich Hainrich zu den zeiten pfarrer der pfarrkirchen sannd Gilgen zu Gumpendorf vergich vnd tuen kundt offennlich an disem brief, das ich meinen weingarten gelegen an der Waligris zunegst der geistlichen herren weingarten von Paungartennperg des ain viertail ist, von dem ich auch alle jar dien meinem grundtherrn herrn Jacoben dem Lo^effler dritthalb viertail weins ze perckrecht vnd drew ort zu vogtrecht vnd nicht mer, den vor genannten weingarten hab ich recht vnd redlich verchaufft vnd geben mit meines perckherren vnd grundtherren handt des vor genannten herrn Jacobs des Lo^effler den erbern geistlichen herren abbt Johannsen zu Paiongarten-perg vnd dem conuent gemain desselben chlosters allen iren frummen damit ze schaffen verkauffen versetzen vnd geben wem sy wellen an allen irrsal wie so in das aller beste fueget, vmb funfftzehen phund wiener phenning der ich ganntz vnd gar verricht vnd gewert bin. Vnd das diser kauf fu^erbas stet vnd vnzebrochen beleib, daru^eber so gib ich in disen brief zu einer ewigen bestetigung diser sach versigelten mit meinem anhangunden innsigell vnd mit meines perckherren innsigel des vor genanten herren Jacobs des Lo^vffler. Gegeben zu Wienn nach Cristes geburd drewtzehen hundert iar darnach in dem newn und funffzigistenn iar des freitag in der quottember wochen in der vassten.

Source Fulltext: OÖUB 7 (Wien 1876) S. 626, Nr. 616