Ego Chunradus de Friburger diuina prouidencia decanus Chremensis presentibus profiteor et publice recognosco, quod ad instanciam et peticionem venerabilis et religiosi viri domini Johannis abbatis monasterii in Paumgartenperig ordinis sancti Bernhardi et principaliter ob divini cultus augmentum ad consecrandum cappellam in curia ipsius et sui conventus Chremse sitam in honore gloriose virginis Marie fundatam per reuerendum in Christo patrem et dominum dominum Blasium ordinis beati Augustini Episcopum Millensem absque preiudicio matricis ecclesie sancti Viti Chremse meum adhibeo beneplacitum et consensum. Et pro recompensa idem venerabilis dominus abbas quinque libras denariorum Wiennensium pro dimidia libra reddituum ecclesie mee Chremensi tribuit et donavit. Insuper ad preces prefati domini abbatis parvam campanam pro signo misse et eleuationis corporis Christi in eadem cappella habendam concessi ex gratia speciali. Ceterum volo, quod nullus mendicantium nec in patrocinio nec in dedicatione dictam cappellam in divinis inofficiet et procuret sed solum per presbiteros et socios ecclesie parrochialis diuina officia decantentur et collecte et oblationes que ibi fuerint ex deuotione fidelium oblate cedere debent parrochiali ecelesie antedicte. Et in euidens testimonium premissorum sigillum meum presentibus est appensum. Datum anno domini||
millesimo trecentesimo quinquagesimo nono feria secunda post festum beati Pangracii martiris.

Source Fulltext: OÖUB 7 (Wien 1876) S. 648f., Nr. 638