Wier abt Jans und der convent gemain ze Paumgartenperg verjehen, daz uns der erber chnecht Michel Ulrich dez O^echslein veter dem Gott genad und die erben gemain geben habent zway und dreizik phunt phenning der hab die er lazzen hat, und habent uns die geben durich seiner sel hail willen und auch in und allen iern vodern selen ze trost mit der weschayden, daz wier zway phunt ewiges gelcz darumb schullen chauffen in unser pitanczamt. Nu haben wier in auzczaigt zway phunt gelcz unsers vreyn aygens newn schilling gelcz am Czeissenperg pey der Freinstat, fumf schilling von dez Sailer lehen und fumczk phenning von ainem akher haizt der Chindakcher und sind paide gelegen ze Obern Czierknarn in Rieder pharr. Den gelt schol unser pitanczer all jar invessen und schol den herren in daz relent davon jaerleich geben an sand Pauls tag also wier in pegen mit der gedechnuzz dez andern tages nach sand Petern tag ain mal visch wein und semel alz gwodleich (sic) ist in unserm chloster, und sullen auch wier in darumb jaerleich ain jartag begen an dem vorbenanten tag mit allen sachen alz wier gwonhait haben in unserm chloster und in unserm orden alz man andern erbern laewten beget. Wer awer daz wier den jartag jerleich nicht wegigen (sic) und dem convent daz mal nicht gaeben alz oben weschriben stet, zehant so schol sich der vorgenant Michel und die andern erben wer den prief innhal der vorbenanten gu^eter underwinden und schol den dienst davan innemen alz lang, uncz daz die saumchait mit einner gebizzen wider van uns gepessert werd, so ist unser pitanczer der gult wider ledig alz vor. Dez ze u^erchund geben wier in den offen prief besiglt mit unser payder anhangunden insigeln. Der ist geben nach Christi gepu^erd dreuczehenhundert jar darnach in dem zway und sybenczkisten jar an sand Lamberti tag.

Source Fulltext: OÖUB 8 (Wien 1883) S. 607, Nr. 606