Wir Albrecht von Gotes gnaden hertzog zu Österreich zu Steyr zu Kernden und zu Krain graf zu Tyrol etc. bekennen und tun chunt offenlichen mit dem brief, daz wir den erberen geistlichen unsern lieben andechtigen abt Johansen zu Baumgartenperg durch der frumkait willen, der wir von im underweiset sein, zu unserm capplan und in mitsampt seinen gotzhaus und allen seinen leuten und gütern in unser besunder gnad und scherm genomen haben und geben im auch mit disem brief alle die recht genad und freyhait, die ander unser und unsers hofs capplan habent von alter her gehebt oder noch habent. Davon gebieten wir allen unsern hauptleuten lantherren rittern und knechten purggrafen pflegern richtern mauttern zollnern und allen andern unsern amptleuten und undertanen, wie die genant sein, daz si in, den egenanten abt, und seins gotzhauses leut und güter lassen gunsticleich empfolhen sein und sie allenthalben furdern und schirmen durch unser willen, wan uns das ein besunder gevallnuss und dienst ist. Mit urchund ditz briefs geben ze Wienn am Freitag vor sand Anthony tag anno domini millesimo trecentesimo octuagesimo primo.||
Dominus dux per dominum Johannem Sneberger cappellanum.

Source Fulltext: OÖUB 10 (Wien 1933) S. 1-2