Wir Albrecht von Gots gnadn herczog zu Österreich ze Steyr ze Kernnden vnd ze Khrain graf zu Tyrol etc. bekennen vnd tuen kund offennlich mit disem brief vmb die viertzehen schilling phening gelts an anndern klainen dienst gelegen auf zwain lehen zu Kolbingen, der ains den Smid angehört vnd das annder Öttlein Petreins aidem daselbs zu Kolbingen, die von vnns zu lehen sind vnd die vnnser getrewer Herwert Nyclases sun des Payrn von Kolbingen den erbern vnd geistlichen lewten von Pawngartenperg gegeben hat, als der brief sagt, den er jn darumb hat gegeben, das wir die aigennschafft derselben phenning güllt den egenannten geistlichen dem abbt vnd dem conuennt zu Pawngartennperg lautterlich durch Got vnd durch vnnserr vnd aller vnnser vodern vnd nachkomen seien trost vnd hail vnd auch durch jrer vleissigen bet willen gegeben haben vnd geben auch also, das sy damit allen jren frumen schaffen sullen vnd mügen, wie in das allerpesst kerne vnd fuege an all jrrung, vnd zu gleicher weis, als sy mit anndern jren aigenn güetern tuend. Des geben wir zu vrchundt disen brief besigelten mit vnserm jnnsigell. Der brief ist geben zu Wienn an Montag nach sannd Niclastag nach Christs geburde drewtzehen hundert jar darnach in dem funff und achtzigistenn jar.

Source Fulltext: OÖUB 10 (Wien 1933) S. 351-352