Bonifatius episcopus seruus seruorum Dei. Dilectis filiis abbati et conventui monasterii in Powngarporg Cisterciensis ordinis Patauiensis diocesis salutem et apostolicam benedictionem. Solet annuere sedes apostolica piis uotis et honestis petentium precibus fauorem benivolum impartiri, eapropter dilecti in Domino filii uestris iustis postulationibus grato concurrentes assensu omnes libertates et inmunitates a predecessoribus nostris Romanis pontificibus siue per priuilegia uel alias indulgencias uobis et monasterio uestro concessas necnon libertates et exemtiones secularium exactionum a regibus et principibus uel aliis Christi fidelibus rationabiliter uobis et monasterio predicto indultas, sicut eas iuste et pacifice obtinetis, uobis et per uos eidem monasterio auctoritate apostolica confirmamus et presentis scripti patrocinio communimus. Nulli ergo omnino hominum liceat hanc paginam nostre confirmationis infringere uel ei ausu temerario contraire. Si quis autem hoc attemptare presumpserit, indignationem omnipotentis Dei et beatorum Petri et Pauli apostolorum eius se nouerit incursurum. Datum Rome apud sanctum Petrum Nonis Aprilis pontificatus nostri anno octauo.

Source Fulltext: OÖUB 11 (Wien 1983) S. 606