CLXIX.

Ich prawn von Sazz, vnd mein hauzvrowe vro ann, vnd vnser sun paid, Prawn vnd Jans, vnd alle vnser erben, di nv sint oder her nach chunftig werdent. vergechen offenwar vnd tuen chunt an disem prief, allen den di in sehent oder horent lesen, das wir noch weiser levt, vnd vnser vreunt rat, vnd mit gutleichen willen, den hof. der do haizzet Haitfoltstorf, auf dem ybs velt, mit allem dem recht, das wir in vnd vnser vor vadern gehabt haben, besucht vnd vnbesucht, cze holtz vnd cze velt, der vnser vreiz aigen ist gewesen, haben cze chauffen ge geben, dem ersam herren apt Otachem vnd seinem gotzhaus cze Seydeinsteten, vmb viertzig phunt phenning wienner munzze, der wir gar gewert sein. in sogetaner beschaidenhait. ob das wer, das von vns oder von dhainen vnser erben an dem vor genanten hof dhain chrieg oder dhain ansprach auf steund dem vor genanten herren. Apt Otachem vnd seinem gotzhauz, den schulle wir vnd vnser erben dem vor genanten herren. Apt Otachem vnd seinem gotzhaus auz richten. noch lantz recht. Das dem vorgenanten herren Apt Otachem vnd seinem gotzhauz di red stet vnd vnczebrochen beleib. dor vber gib jch in disen prief czv einer ebigen vrchunt. mit meinem an- hangunden Insigel, Des sint geczeug. Her Chunrat der purgraf von Sevsenek, her Alram von Reikerstorf Her vlreich der Pauzz von wisenpach. vnd wernhart der Schafferuelder, wluinch von Tesselperg vnd sein pruder Rudolf, Alram von dem wasen, vnd sein pruder Hainreich, vnd ander pidiber leut genug. Das ist geschechn, do von Christes gepurt ergangen waren Tausent jar, vnd drev hundert Jar, dor nach in dem sechs vnd czwain- czigstem Jar, an Sant vrbans tag.

Original auf Pergament; nur das erste Siegel noch vorhanden.

Ybbsfeld, Gegend am linken Ufer der Ybbs zwischen der Stadt Ybbs und der Pfarre St. Georgen, in welcher letzteren der Hof H. jetzt Hömers- dorf liegt.

183