In dem namem^a) vnsirs herrin, der allir dinge schepher ist. Es si kvnt allen dien, die lesint alder hoerint lesin den brief, || dc ich Wernher der Hunt¹ ein bvrger von sant Gallvn gen han dem spitel ze sant Gallvn² sehr phvnt phenninge || vnd ein halbis hvs ze Kostinze³, von dem man zinse git XVIIIj ß., dvr miner sele willen vnd miner wirtinne || vron Bertvn, also dc der selbe spital ze minen iarzitte vnd ze miner wirtinne vron Bertvn sol gen die phenninge ze ietwedirs jarzit ze sant Laurentin⁴, ze vnsir vro^vwun⁵, ze sant Johanne⁶, ze sant Osalt⁷, zem heiligen grabe⁸, ze sant Fidvn⁹, ze sant Mangvn¹⁰, ze sant Lienhart¹¹, ze dem spital an dc Lisibvel¹² vnd der closenerrvn ze sant Johanne vnd der closnerrvn ze sant Mangvn vnd der closnerrun ze sant Jeoriun¹³ vnd der closnerrvn vffin Rvtmont¹⁴, vnt swa man dc jarzit nvt zemin lvt, da sol man enkein phenning hin gen. Der vorgenante spital der sol mir von dien VI phvndin gen von ieclichim phvnde II ß gwns, ob sv dar an gewnnin werdint, vnd wirt des gwunnis me, dc sol belibin bi den sehs phvndin, vnd X ß. phenninge^b) von dem halbin hvse zu Kostinz. Siv son o^vch rihten von dem spital allin den zol, den ich ze Kostinz wirt gente, die wil ich lebe. Ich wil o^vch den gwun von den phenningin nemin, vnz dc dv selbvn VI phvnt vn angeleit sint^c). Dc diz geware vnd veste belibe, so sol der spital disin brief sigiln mit sinem rehtim ingesigil. Dis beschah, do mal zalte von goz gebvrte M°. vnd CCC°. an dem trittin jar. Der spital der sol gen des vorgenandin gv^otis XV. ß. vmbe eiger, dc sv geben gesvnden vnd siechen ieclichim zwei eiger alle tage von ostron vnz ze phinstin, ald tv^ont sv des nvt, so son sv der selbon phenninge der XV. ß. dien vor genandin capillan gebvndin sin ze genne.

Source Fulltext: Chartularium Sangallense V, Nr. 2605, S. 87.