Allen^a) den, die disen brief ansehent lesent oder ho^erent lesen, kúnde ich Johans Brúning von Bernang¹ im Rintal vnd || vergich offenlich an disem brief fúr mich vnd min erben, das mir der beschaiden Cristan Ha^vgg von Bernang im Rin||tal a^ellú sinú reht, so er hatt an dem gůt, das man nemmt Dietrichs gůt von Ennwille², gelegen ze Bernang im Rintal, || das ainhalb sto^vsset an Ja^ecli Berschis gůt vnd anderthalb an das vallentor, das selb gůt sin reht waldêrbzinslêhen was von dem spital der siechen ze sant Gallen³, reht vnd rêdlich ze ko^vffenn geben hatt vmb zwelf pfunt pfenning fúnf schilling pfenning minder gůter vnd gena^emer Costentzer múnse. Ich vergich o^vch, das mir der selb Cristan Ha^vgg das vorgeschriben gůt, das man nemmt Dietrichs gůt von Ennwille mit hus hofstat vnd hofraiti vnd mit aller zůgeho^erde dafúr vnd in dem rehtem ze ko^vffenn geben hat, das da von vnd darab dem vorgeschriben spital ze sant Gallen ia^erklich vnd êwiges zinses gat vnd gan sol, als hienach beschaiden ist an disem brief. Ich vergich o^vch, das mir der selb Cristan Ha^vgg a^ellú sinú reht an dem vorgeschriben gůt, das man nemmt Dietrichs gůt von Ennwille, mit hus hofstat vnd hofraiti vnd mit allen zůgeho^erden v^fgeben vnd zů minen handen brâht hât mit des selben spitals pfleger handen vnd das mir der selb spital das selb gůt mit allen rehten vnd zůgeho^erden reht vnd rêdlich verlihen hat ze ainem rehten walderbzinslehen vmb ainen sta^eten zins mit so^elicher beschaidenhait vnd gedinge, das ich vnd min erben, ob ich enbin, das vorgeschriben gůt mit hus mit hofstat mit hofraiti vnd mit aller zůgeho^erde in êren vnd vnwůsteklich haben vnd niessen sont, vnd so^ellin wir den vorgedahten pflegern vnd iren nachkomen zů des vorgedahten spitals handen vnd dem selben spital aller ia^erklich ie ze sant Gallen tag von dem selben gůt zehen schilling pfenning gůter vnd gena^emer Costentzer múnse vnd sehs hu^enr ze rehtem ia^erklichem zinse ân fúrzug vnd ân allen des selben spitals schaden geben vnd rihten. Vnd des alles ze offemm wâren vrkúnde vnd ze ainer sta^eten sicherhait aller vorgeschribner dinge so han ich der obgenant Johans Brúning erbetten den erbern beschaiden hern Cůnrat den Engler ze den ziten lútpriester ze Bernang im Rintal, das er sin insigel fúr mich gehenkt hat an disen brief, vnder das selb insigel ich mich vnd min erben vnd nâchkomen willeklich gebunden han aller vorgeschribner dinge vnd gedinge, won ich aigens insigels nit hatt. Ich der selb Cůnrat Engler lútpriester, als vorgeschriben stât, vergich offenlich, das ich von bette des obgenanten Johansen Brúnings min insigel fúr in gehenkt han an disen brief mir vnd minen erben gantzlich vnscha^edlich. Dirre brief ist geben ze sant Gallen an sant Johans abent des To^vffers ze sunnwenden in dem iâre, do man von Cristus gebúrt zalte drúzehen hundert jâr vnd darnach in dem aht vnd ahtzigosten jâre.

Source Fulltext: Chartularium Sangallense X, Nr. 6272, S. 512-513.