Wir Herman von gottes gnaden abt des gotzhus ze sant Gallen¹ kúnden vnd veriehent || offenlich mit disem brief allen, die in sehent lesent oder ho^erent lesen, das fúr vns kament, || do wir ze gericht sâssen, an der na^ehsten mitwuchen vor sant Hilarien tag Katherina || Růdolfs des Vedres selgen von Alstetten² wilunt elichú wirtinne vnd des selben Růdolfs elichú kint vnd clegton zů Oswalt Rainolten von Veltkilch³ vnd zů sinen geswústergiten vmb ainen wingarten gelegen ze Lúchingen vnd vmb die gebraiten gelegen ob Alstetten in dem Rintal, der selb Rainolt och von des andern gebottes wegen, so im von vns von der vorgenemten Katherinun vnd kinde wegen beschehen was, vor vns ze gegen was, vnd won dú vorgeschriben kint do ze mal vor gericht ir rechten vogt niht hatten noch wern darumbe haben mohten noch hatten, was das recht ge^abe vor vns vmb den vorgeschriben wingarten vnd vmb die gebraiten, daz daz also belibe. Do wart ertailt vor vns mit gemainer vrtailt, daz dú vorgeschriben gebot gantzlich ab sin so^eltin vnd dem egenemten Oswalten vnd sinen geswústergiten vnscha^edlich soltin sin, vnd daz der selb Oswalt vnd sinú geswústergit den vorgeschriben wingarten vnd die gebraiten haben so^eltin vnd och bi der gewêr beliben so^eltin, als sú den selben wingarten vnd die gebraiten hatten vnd vormales bi der gewêr belibent, e das sich dú vorgeschriben clag an hůb, also daz in dú vorgescriben clag noch dú fúrgebot daran enhain schad sin sol, vnd wa^er, daz dú egenemt Kather in ald dú vorgeschriben kint zů dem egenemten Oswalten ald zů sinen geswústergiten ald der selb Oswalt ald sinú geswústergit zů inen ihtes ze sprechenn hettin, da sol inen ze baiden tailn behalten sin, das sú das recht gegen anander sůchent vnd nement an den stetten, da sú es von recht tůn sont^a). Vnd ze vrkúnd der warhait vmb die vorgeschriben sach so haben wir abt Herman da vorgenemt vnser insigel gehenkt an disen brief, won es o^vch vor vns ertailt wart, daz wir ez tůn so^eltin. Geben an der vorgeschriben mitwuchen in dem jar, do man zalt von gottes gebúrt drúzehenhundert jar vnd darnach in dem vier vnd fúnfzigosten jar.

Source Fulltext: Chartularium Sangallense VII, Nr. 4340, S. 227.