Allen den, die disen gegenwurtigen brief ansehent ald ho^erent lesen, kunde ich her Willehalm von Staina ritter vnd^a) min sun Willehalm¹, das wir || vnsern hof vf is Aichan² vnd alles, das dar zv^o ho^eret, mit stocke mit zwie mit holze mit velde gesůchtes vnd vngesu^echtes vnd bi namen alles, das dar || zv^o ho^eret, haben gegeben ze ko^vfen rehte vnd redelichen dem spitale vnd den durftigon des hailigen gaistes in der stat ze sancte^b) Gallen³ vmb aine || vnd zwainzich marche lo^etiges silbers Kostenzer glo^etis, vnd wurden o^vch des vorgenanten silbers gar von inen gewert vnd von ir pfleger Hainrieh dem elter Blarer. Wir die vorgenanten von Staina haben vns selbe behalten das holze, das da lit vnder dem Raine, vnd swas dar zv^o ho^eret. Wir die vorgesprochen von Staina veriehen offenliche an disem brieve, das wir den vorgenanten hof^c) vnd alles, das dar zv^o ho^eret, vriliche vf gabent in vnsers herren hant bischof Gerhartes von Kostenze⁴ mit allen den worten vnd geta^eten, so ze so^elicher lehenschaft von reht ho^eren sol, won wir den selben hof von dem gotzhuse ze Kostenze ze lehen hetton. Wir die von Staina bede baten vnsern herren bischof Gerharten von Kostenze, das er den vorgenanten hof vnd alles, das dar zv^o ho^eret, lihe Cůnrat dem Munzer vnd Hainrich dem Spiser burgern von Kostenz mit allem rehte, tri^vwe trager vnd pfleger des vorgenanten houes vnd swas dar zv^o ho^eret ze sin des vorgenanten spitales ze sancte^b) Gallen nah des landes gewonhait. Das tet vnser herre bischof Gerhart von Kostenze von vnser baider bette vnd lehe den vorgenanten hof vnd alles, das dar zv^o ho^eret^d), den vorgenanten Cv^onrat dem Munzer vnd Hainrich dem Spiser, getri^vwe pfleger vnd trager ze sin des vorgenanten spitales mit allem rehte nah des landes gewonhait. Dis geschach ze Kostenze in der Bredier kapel⁵ vor den altern, an dem na^ehsten vritage vor der liehtmis in dem jâre, do man zalte von gottes gebvrte tri^vzehen hundert jâre vnd dar nah in dem nvnden jâre. Da ze gegen wâren graue Cůnrat von Bůchegge⁶, Johansv^olriche vom Huse ritter, her Hartman der Munche von Basel pfaffe, Walther von Honberch⁷, Hainrich der Giger vnd Egelolf der Fuhs. Das dis wâre si vnd sta^ete belibe, so an disem brief geschriben stât, da von gibe ich her Willehalm von Staina ritter min insigel an disen gegenwurtigen brief ze ainer rehter sta^eter wârehait.

Source Fulltext: Chartularium Sangallense V, Nr. 2714, S. 160-161.