Allen^a) den, die disen brief ansehent lesent oder ho^erent lesen, kúnd ich Johans von Stainach¹ statamman ze sant Gallen vnd vergich offenlich || mit disem brieue, daz fúr mich kament ze sant Gallen an dem na^ehsten ma^entag vor sant Gregorien tag, do ich offenlich ze geriht saz, diz || nâchgenemten êrbern lút Hainrich, Anna vnd Margaretha, V^olrichs dez Storcheggers von Gebraswîlle² êlichen kint, vnd Cu^eni Cůntzzen || von Gebraswîlle der obgenanten Margarethen êlicher wirt vnd nament ze fúrsprechen Nycolausen Schnider burger ze sant Gallen, der offenot an iro stat vnd von iro wegen offenlich vor mir vnd dem geriht vnd sprach, sú wo^eltint sich willeklich verzihen gantzlich vnd gar fúr sich vnd alle ir erben aller der reht vordrung vnd ansprâchen gaistlichs vnd weltlichs gerihtes, so sú von erbes von erbschaft ald von dehainer lay ander sachen wegen hettint ald hie nâch iemer gehaben oder gewinnen mo^ehtint zv^o allem dem ligenden vnd varenden gůte, daz der obgenant V^olrich Storchegger iro vatter hett vff disen húttigen tag, alz dirre brief ist geben, vnd daz er noch hinnenhin iemer gewunni, ez wa^er von dem selben iro vatter ald von iro můter sa^elgen ald wie ez dar komen wa^er, waz daz wa^er, wâ ez gelegen wa^er ald wie ez genemt wa^er, vnd bâtent mich eruarn an ainer vrtail, wie sú daz tůn so^eltint vnd mo^ehtint, alz reht wa^er vnd daz ez kraft hett vnd haben mo^eht nv^ vnd o^vch hienâch. Daz tet ich vnd ward ertailt mit gemainer vrtail, daz die vorgenemt Anna vnd o^vch die obgenant Margaretha mit dez vorgenanten ir êlichen mannes willen ainen vogt nemen so^eltint an dem ring, wen sú wo^eltint, vnd daz dann der selb iro vogt die vorgenanten Margarethen ze drin mâlen vsser dez gerihtes ring fu^eren so^elt vnd si frâgen, ob si ez willeklich vnd gern ta^et vnd tůn wo^elt, vnd daz dann der obgenant Hainrich mit siner hant vnd o^vch die vorgenanten Anna vnd Margaretha sin swestren mit iro vnd mit dez selben iro vogtes handen vnd o^vch mit miner hant tůn so^eltint vnd daz ez dann also wol kraft vnd maht hetti nâch dem rehten. Do nament sú mit dez obgenanten Cu^eni Cůntzzen willen vnd gunst Herman Egger o^vch burger ze sant Gallen ze vogt, der fůrt die obgenanten Margarethen ze drin mâlen vsser dez gerihtes ring vnd frâgot si als ertailt waz, ob si ez willeklich vnd gern ta^et vnd tůn wo^elt, der sait ze iekklichem mâl bi sinem aide, daz si spra^ech, daz si ez vnbezwungenlich ta^et vnd willeklich tůn wo^elt. Vnd verzigent sich o^vch do die vorgenemten Hainrich Storchegger mit siner hant, Anna vnd Margaretha sin swestren mit iro vnd mit dez selben Herman Eggers iro vogtes handen vnd o^vch mit miner hant offenlich vor mir vnd dem geriht willeklich vnd gern gantzlich vnd gar aller der reht vordrung vnd ansprachen gaistlichs vnd weltlichs gerihtes, so sú vnd iro erben, ob sú enwa^erint, von erbes von erbschaft oder von dehainer lay ander sach wegen hattent ald hie nach iemer gehaben oder gewinnen mo^ehtint zv^o allem dem ligenden vnd varenden gůte, daz der obgenant V^olrich Storchegger iro vatter hatt vff disen húttigen tag, alz dirre brief geben ist, vnd daz er noch hinnenhin iemer gewinnet, waz daz ist, wâ ez gelegen ist ald wie ez genemt ist. Vnd swůrent o^vch do die vorgenemten Hainrich Storchegger, Anna vnd Margaretha sin swestren mit dez obgenanten Herman Eggers iro vogtes willen iekliches besunder willeklich ainen gelêrten ait ze den hailigen mit v^f gehabnen vingern, daz sú noch dehain iro erben noch nieman andre von iro wegen noch an iro stat den vorgenemten V^olrich Storchegger iro vatter noch nieman andre, wer die wa^erint, sú sigent gaistlich oder weltlich, den er dann daz selb sin gůt ez wa^er ligentz oder varentz gůt alles ald in dehaine(m) tail ga^vbi fůgti oder machoti, bi dez selben iro vatters leben noch nâch sinem tode niemer mê súllent noch wellent ansprechen vf triben bekúmberren bekrenken noch in kain wîs beswa^eren weder mit geriht noch ân reht noch mit enkainer lay ander sach. Vnd ist diz alles beschehen vnd vollefu^ert reht vnd redlich mit allen den Worten werken vnd geta^eten, so nâch gewonhait vnd nâch reht darzů gehôrent ald ho^eren soltent vnd nôtdurftig wârent vnd alz ez kraft vnd maht sol vnd mag han. Vnd ze ainem wâren vrkúnde vnd gantzzer sicherhait aller der vorgeschribenen dinge vnd vergiht so han ich Johans von Stainach amman da vorgenemt von dez gerihtes wegen min insigel gehenkt an disen brief, won ez o^vch mit gemainer vrtail ertailt ward, daz ich ez tůn so^elt. Dar nâch veriehen wir die vorgenemten Hainrich Storchegger, Anna vnd Margaretha sin swestren vnd Cu^eni Cůntzzen der selben Margarethen elicher wirt, Herman Egger vogt vnd Nycolaus Schnider fúrsprech in der vorgeschribenen sache ainer gantzzer wârhait aller der dinge, so von v´ns an disem brief da vorgeschriben stant. Vnd ze merer sicherhait der selben dinge so haben wir die obgenanten Herman Egger vogt vnd Nycolaus Schnider fúrsprech o^vch v´nserú insigel gehenkt an disen brief, vnder dez selben Herman Eggers insigel wir die obgenanten Hainrich Storchegger, Anna vnd Margaretha sin swestren vnd Cu^eni Cůntzzen v´ns willeklich gebunden habent, won wir aigener insigel niht haben, wâr vnd sta^et ze lassenn alles, daz von v´ns da vorgeschriben stât an disem brief. Der geben ist ze sant Gallen an dem vorgeschribenen ma^entag in dem jâr, do man zalt von gottes gebúrt drúzehenhundert jâr, sehszig jâr vnd darnâch in dem sehsten jâre.

Source Fulltext: Chartularium Sangallense VIII, Nr. 5016, S. 205-206.