Wir abt V^olrich dez gotzhus ze Salmenswile dez ordens ze Zitêl gelegen in Costentzer bistůme || tůnt kvnt vnd vergehin offenlich mit disem brief, das fúr v´ns kam Dyethelme von Gúttingen vnde || offenot, das er ains rehten koffes v´erain komen sie mit Johansen vnd Cv^onratten von Stainâ gebrůdern vmb || den obern hof ze Breginstorf, darab v´ns vnd v´nserm gotzhus ja^ergelichs ze rehtem zins gat ain vierdvng wahs, vnd gab och der selb Dyethelme von Gúttingen den selben hof mit aller siner zůgeho^erde willeclich vff an v´nser hant vnd verzeh sich daran fúr sich vnd sin erben vnd nachkomen gen den obgenanten von Stainâ gebrůdern vnd gen allen iren erben vnd nachkomen alles des rehtes, aller der vordervnge vnd aller der ansprach, so er daran hatte ald von dekainen dingen iemer gewinnen mo^eht von dekainer slaht geriht alder reht gaischelichs ald weltlichs, vnd bat v´ns och den selben hof lihen den selben von Stainâ gebrůdern vmb den selben zins. Der bet haben wir in gewert, als wir durh reht soltent, vnd haben den selben hof von dem selben Dyethelm von Gúttingen vff genomen an v´nser hant vnd haben in wider gelihen vnd lihent in mit disem brief den selben Johansen vnd Cv^onratten von Stainâ gebrůdern vnd iren erben zainem rehten sta^eten erblehen vmb den obgenanten zins, also das die selben von Stainâ gebrůder vnd alle ir erben vnd nachkomen den selben hof ze Breginstorf mit wasen, mit zwi, mit holtz, mit velde, mit akker, mit wisen, mit twingen, mit ba^ennen vnd mit allen nútzen vnd gewonhaiten vnd mit allen den rehten, als in der selb Dyethelm von Gúttingen gehebt vnd genossen hat vnd an sv´ braht, also sont och si in nv^ hinnanhin haben vnd niessen vmb den selben zins, vnd haben die selben lehenschaft gen inen getân vnd vollefu^ert mit allen den worten werken vnd geta^eten, so darzů hort vnd notdúrftig was nach gewonhait vnd nach reht. Vnd des ze warem vnd offeme vrkv´nd vnd sta^eter sicherhait aller dirre selben dinge geben wir vorbenenter abt V^olrich v´nser insigel an disen brief. Der ist ze Salmenswile geben, do man von Cristes gebúrt zalt drv´zehenhvndert jar, darnach in dem vier vnd ffv´nfzigosten jar, an sant Gerdrut tag.

Source Fulltext: Chartularium Sangallense VII, Nr. 4348, S. 231-232.