Wir^a) Chůno von gottes gnâden abt dez gotzhus ze sant Gallen¹, daz ân alles mittel zv^o geho^ert dem stůl ze Rôme, tůn kunt vnd verie||hent offenlich mit disem brieue allen, die in sehent lesent oder ho^erent lesen, daz fúr v´ns kament ze sant Gallen an dem tag, alz dirre brief geben || ist, do wir offenlich ze geriht sassent, diz nâchgenemten erberen lút fro Anna Gerwigs dez Paygers sa^elgen wilunt burgermaisters ze sant Gallen êlichi || husfro^vw, Gerwig vnd Lienhart die Payger ir êlichen sún burger ze sant Gallen vnd offenoten mit fúrsprechen offenlich vor v´ns vnd dem geriht vnd sprachent, daz sv´ mit ainberem willen vnd mit gůter vorbetrahtung den hof gelegen ze Oberndorf², den man nemmet der Payrinen hof, die zehenden von den vnd ab den gu^etern ze Oberndorf, die zehenden von dem vnd ab dem gůt, daz man nemmet daz Rúdli³, gelegen vnder Rosenberg⁴, die zehenden von den vnd ab den gu^etern ze Schorantzhůb⁵, die zehenden von den vnd ab den gůtern ze Rain⁶, die zehenden von den vnd ab den gu^etern ze No^echla⁷ vnd ze Mettendorf⁸ vnd von allen den gu^etern vnd schůppůssen, die darzů vnd darin geho^erent, mit hus mit hof mit stadel mit hofstetten mit akkern mit wisen mit wasen mit zwi mit holtz mit veld mit wunn mit waiden mit stegen mit wegen mit wasser mit wasserflússen vnd gengen mit allen rehten nútzzen vnd gewonhaiten vnd mit allem dem, so von reht ald von gewonhait darzů vnd darin geho^erent, ez sie genemptz oder vngenemptz gesůchtz oder vngesůchtz wissentz oder vnwissentz, vnd mit namen, alz sv´ den selben hof vnd die zehenden vntz her vff disen húttigen tag, alz dirre brief ist geben, gehept vnd genossen hettint, der selb hof zehenden vnd gu^eter von v´ns vnd v´nserm vorgeschribenen gotzhus iro reht lehen wa^erint, redlich vnd reht aines sta^eten êwigen ko^vffes verko^vft vnd ze ko^vffenn geben hettint dem beschaidenn Albreht von Ainwille hern Burkartz sa^elgen sun von Ainwille⁹ vnd sinen erben, ob er enwa^er, vmb vier hundert gůter Vngerscher vnd Behemscher guldin vnd vmb drú hundert phunt gůter vnd genger haller, der selben guldin vnd o^vch der haller sv´ gantzlich von im gewert wa^erint vnd enphangen hettint vnd an iren offenn nutz bewendet, vnd batent v´ns eruarn an ainer vrtail, wie sv´ im den vorgeschribenen hof zehenden vnd gu^eter vertgen vnd zv^o sinen handen bringen so^eltint vnd mo^ehtint, alz reht wa^er vnd daz ez kraft hett vnd haben mo^eht nv vnd o^vch hie nâch. Daz taten wir vnd ward ertailt mit gemainer vrtail, daz die vorgenant fro Anna die Payrin ainen vogt nemen so^elt an dem ring, wen si wo^elt, vnd daz sv´ daz danne mit iro vnd mit dez selben ir vogtes handen vnd o^vch mit v´nser hant tůn so^eltint, vnd daz ez danne also wol kraft vnd maht hetti nach dem rehten. Do nam si ze vogt Bilgrin Gemúnder iren brůder o^vch burger ze sant Gallen, vnd gabent do die vorgenemten Gerwig vnd Lienhart die Payger gebrůder mit iro handen vnd die vorgenant fro Anna iro můter mit ir vnd mit dez vorgenanten Bilgris ir brůders vnd ir vogtes handen den vorgeschribenen hof zehenden vnd gu^eter mit allen rehten vnd mit aller zv^o geho^erde willeklich vnd frilich reht vnd redlich vf an v´nser hant vnd batent v´ns die lihen ze rehtem lehen dem vorgenanten Albreht von Ainwille. Daz taten wir durch iro bet vnd lúhent den vorgeschribenen hof vnd die zehenden vnd gu^eter mit allen rehten vnd mit aller zv^o geho^erde vnd lihent sv´ mit vrkúnd diz brieues reht vnd redlich ze rehtem lehen dem vorgenanten Albreht von Ainwîlle. Vnd ist diz alles beschehen vnd vollefu^ert reht vnd redlich mit allen den worten werken vnd geta^eten, so nach gewonhait vnd nach reht darzů gehortent ald ho^eren soltent vnd nôtdurftig wârent vnd alz ez kraft vnd maht sol vnd mag han.Vnd ze vrkúnd der warhait aller diser vorgeschribenen dinge vnd vergiht so haben wir abt Chůno abt dez vorgeschribenen gotzhus ze sant Gallen v´nser insigel gehenkt an disen brief. Darnach veriehent wir die vorgenemten Anna die Payrin, Gerwig vnd Lienhart ir sún vnd Bilgri Gemúnder vogt in der vorgeschribenen sache ainer gantzzer warhait aller der dinge, so von v´ns an disem brief da vorgeschriben stânt, vnd ze merer sicherhait der selben dinge so haben wir o^vch v´nserú insigel gehenkt an disen brief. Der geben ist ze sant Gallen an dem na^ehsten ma^entag vor sant Gallen tag in dem jâr, do man zalt von Cristus gebúrt drúzehenhundert jar, ahtzig jar vnd darnach in dem andern jâre.

Source Fulltext: Chartularium Sangallense X, Nr. 5926, S. 91-92.