Allen^a) den, die disen brieff ansehent lesent oder ho^erent lesen, kúnde ich Johans der Sporer der junger burger ze sant Gallen vnd vergich offenlich an || disem brief, als mich die fromen wisen der burgermaister vnd der rât ze sant Gallen gehaimot vnd in iro vanknust vnd banden hattent || vmb das, das ich wider den burgermaister vnd wider den rat daselbs fra^euenlich gerêtt hatt vnd besunder das ich in tro^ewte ab ze sagenn || âne alle iro schulde, vnd won aber si mich begnâdot hant vnd mich durch min vnd miner frúnd ernstlich bett ledig vss der vanknust hant gelâssen, darvmb so han ich ffrilich vnd vnbetwungenlich vngebunden vnd vngeuangen mit gůter vorbetrahtunge offenlich ainen gelerten ait liplich zů got vnd zů den hailgen gesworn mit v^fgehabnen vingern, vmb die vorgedahten vanknust vnd getât der vorgedahten des burgermaisters des râtes vnd aller burger gemainlich der stat ze sant Gallen vnd iro ieklichs besunder vnd mit namen aller dero, wer die sint, die an der selben miner vanknust schuld gehept hant mit ra^eten oder mit geta^eten oder in dehain wîse, luter gantz vnd gůt frúnd ze sinne vnd alle min frúnd inen darvmb ze frúnd ze gewinnenn ân allen fúrzug vnd die selben vanknust niemer ze andenn noch ze a^eferrenn weder mit gaistlichem noch mit weltlichem geriht noch âne geriht weder mit worten noch mit werken noch in kain wîse noch ieman von minen wegen âne alle geua^erde. Ich han o^vch in den selben ait genomen vnd gesworn, das ich gemain stat ze sant Gallen niemer angriffen noch beschadgen sol noch wil wider rehtes. Wa^er aber, das got nit wêlle, das ich den ait iemer v´berfu^eri an dehainem vorgeschribenn stuk, so sol ich den selben burgern vnd gemainer stat ze sant Gallen hundert pfunt gůter vnd ga^eber haller gantzlich veruallen sin ân alle widerrêde, vnd han in vmb das selb gůt zů mir ze merer sicherhait ze rehten búrgen geben vnd gesetzt Dankwarten vnd Eglin die Sporer min brůder, Johansen den Gna^epser, Nyclausen Horchental den man nemmt Fu^egli, Hugen Ga^essler von Gosso^vw¹ vnd Hugen Ga^essler sinen sun, Cůnrat Helffenbergen, Hugen Zilin den man nemmt Pappus, V^olrichen vnd Růdolffen die Ortwin gebrůder, Walthern Brising, V^olrichen Toppelstain, V^olrichen den Suter von Goss^vw mine o^ehen, Johansen Wirt den brotbek vnd Cůnrat den Músler den man nemmt Rysi minen swâger, die hant alle vnuerschaidenlich gelopt ieklicher mit siner trúwe, ob das wa^eri, das ich in des selben gůtes veruieli, als vor ist beschaiden, das si dann alle vnuerschaidenlich den selben burgermaister den rat vnd gemainer stat ze sant Gallen die selben hundert pfunt gůter haller gantzlich geben weren vnd rihten sont vnd in o^vch gebunden sin sont, inen das selb gelt gantzlich ze gebenn vnd vsszerihten âne allen fúrzug vnd an alle widerrede âne alle geua^erde. Vnd wa^er, das ich ald die obgenanten búrgen inen das selb gůt dann nit rihtint vnuerzogenlich, so hant die selben burgermaister der rât vnd die burger gemainlich ze sant Gallen vnd ir helffer fries vrlob vnd vollen gewalt, das si mich vnd o^vch die obgenanten búrgen darvmb pfenden no^eten heften vnd angriffen sont vnd mugent an lúten vnd gůten in stetten in do^erffern vnd vff dem lande mit gaistlichem vnd mit weltlichem geriht vnd âne alles reht, wie vnd wâ oder wahin si das getůn mugent oder went, als vil vnd als dik, vntz das si der selben hundert pfunt gůter vnd ga^eber haller vnd och des schaden, in den si vnd ir helffer von des selben pfendenns no^etens vnd angriffens wegen koment, gantzlich gewert vnd v^ssgeriht werdent, vnd sol mich noch die obgenanten búrgen da vor nit schirmen enkain frihait noch gewonhait enkain buntnust burgreht noch stettreht noch kain lantfrid enkain reht weder gaistlichs noch weltlichs gerihtes noch enkain ander sach noch fúrzug. Ich der obgenant Johans Sporer han o^vch in den vorgeschriben ait genomen vnd gesworn, wa^er das ich dehainerlay sto^ess sach oder ansprachen hinnanhin hêtt oder gewunni zů gemainer stat ze sant Gallen oder zů dehainem burger ald burgerinen ze sant Gallen, als dik das bescha^eh vnd wo^elt ich dann ie darvmb rehtes nit enbern, das ich dann ie darumb rehtes pflegen vnd reht von in nemen sol vnd wil ze sant Gallen in der stat vor irem geriht vnd niendert anderswâ nâch der selben stat reht vnd gewonhait, es wa^er dann, das ich daselbs rehtlos gelassen wurdi vnd das das kuntlich da wurdi, so ist mir behalten vnd in dem ait v^ssgelassen, das ich das reht ie dann anderswa sůchen sol vnd mag, da es dann billich vnd muglich ist âne geua^erde. Ich han och gelopt vnd loben mit disem brief fúr mich vnd min erben, die obgenanten búrgen alle ze lo^esen von allem dem schaden, in den si koment von diser búrgschaft wegen, vnd han in o^vch erlo^vbt, min vnd miner erben gůt darvmb an ze griffenn vnd ze pfendenn in aller wise als den obgenanten burgern vnd der stat ze sant Gallen, als vor ist beschaiden, vntz in ir schad gantzlich abgelait wirt. Vnd ze offemm waren vrkúnde vnd sta^eter sicherhait aller vorgeschribner dinge vnd gedinge so han ich der obgenant Johans Sporer min insigel offenlich gehenkt an disen brief, vnd wir die obgenanten búrgen Dankwart vnd Egli die Sporer gebrůder, Johans der Gna^epser, Niclaus Horchental genant Fu^egli, Hug Ga^essler von Gosso^vw vnd Hug Ga^essler sin sun, Cůnrat Helffenberg, Hug Zili, V^olrich vnd Růdolf die Ortwin, Walther Brising, V^olrich Toppelstain, V^olrich der Suter von Gosso^vw, Johans Wirt vnd Cůnrat Músler veriehent alle offenlich ain gantz wârhait aller der dinge vnd gedinge, so von v´ns da vorgeschriben stat an disem brief, vnd des ze merer sicherhait so habent wir die selben Johans Gna^epser, Niclaus Horchental, Hug Ga^essler vnd Hug sin sun, Cůnrat Helffenberg, Walther Brising, V^olrich Toppelstain vnd Cůnrat Músler alle v´nsrú insigel o^vch gehenkt an disen brief, vnd won wir die andern búrgen aigner insigel nit hattent, so habent wir v´ns willeklich gebunden aller vorgeschribner dinge vnder der beschaidnen Jacob Růprehtz, den man nemmt der Lo^ew, statammans² vnd vnder Johansen Entziswillers³ des vogtes ze sant Gallen insigeln, die irú insigel durch v´nser bett fúr v´ns gehenkt hant an disen brieff inen vnd iren erben vnscha^edlich. Dirr brief ist geben ze sant Gallen an v´nser frowen abent ze mittem o^vgsten in dem iâre, do man von Cristus gebúrt zalte drúzehenhundert jâr vnd darnach in dem nún vnd ahtzigosten jare.

Source Fulltext: Chartularium Sangallense X, Nr. 6343, S. 587-588.