Wir Herman von gottes vnd des stůls gnaden ze Rôme besta^eter abt des gotzhus ze sante Gallen¹ tůn kunt vnd veriehen || offenlich an disem brieue allen, die in ansehent lesent oder ho^erent lesen, das wir schuldig sin vnd gelten súlin v´nserm getrúwen || lieben Eglolfen von Altstetten² aht march silbers vmb sinen dienst, vnd wan wir nu ze mâle nút bar silber haben, dauon || haben wir dem selben Eglolfen von Altstetten amman ze Appacelle³ die selben aht march geschlagen vffen das mayierampt ze Marpach⁴, das vormals ouch sin pfant was, zů dem, das er ê darvffe het. Wir haben im ouch darzů versetzet vmb die selben aht march silbers sehs viertal kernen geltes vsser dem hof ze Marpach vnd von der alpe ze Plis⁵ in sant Johanner tal⁶ sehszig ka^ese geltes, der iegliche aines pfennings werd ist, ze ainem rehten gewerten pfande, das er sú aller ja^erlich innemen sol, vntz das wir ald v´nser nahkomen im die vorgenemten aht march silbers geben. Vnd ze ainem waren vrkúnd der selben dinge henken wir v´nser insigel an disen brief. Der geben ward ze sante Gallen in der stat, do man zalt von gottes geburt drúzehenhundert jâr viertzeg jâr, darnah in dem êrsten jâr, ze inga^entem brachod.

Source Fulltext: Chartularium Sangallense VI, Nr. 3776, S. 351.