Allen^a) den, die disen brief an sehent oder ho^erent lesen, kúnd ich Hainrich von Altstetten¹ vnd vergih des offenlich mit disem brief fúr mich vnd fúr alle || min erben vnd nâhkomen, das ich kam hútt dis tags, als dirr brief geben ist, fúr den erwirdigen fúrsten minen gna^edigen herren Cůnen von gottes || gnaden abt des gotzhus ze sant Gallen² ze Wil³ in sinem hof vnd lait im da fúr vnd sprach, das min brůder⁴ von todes wegen abgangen || wa^eri. Des wa^erint disú nâhgeschriben gu^eter vnd gelt die múli gelegen an der statt ze Altstetten, der hof A^ekerwille⁵, der wingart vnd der torgel gelegen an dem Kranbu^el⁶, den man nemt der Odrer, der zehend halber vff der Ho^ehi⁷, zehen Schilling pfenning geltz von hofstattzins ze Altstetten, der bongart, den man nemt der Kitzzinen bongart, ain ha^elbú juchart akkers im Ober Veld⁸ vnd ain ha^elbú juchart akkers im Nider Veld⁹ elli ha^elbú reht lehen gewesen wa^erint^b) von im vnd von sinem gotzhus ze sant Gallen, vnd wa^eri im vnd sinem gotzhus mines brůder tail der selben gu^eter vnd gelt von dem selben minem brůder sailigen letklich ledig worden vnd genauen, won si die selben gu^eter vor langem zit von enander getailt vnd gesúndert hettint, vnd batt den selben minen herren mit flissigem ernst, daz er mir die gnad tůn wolti, daz er minen tail der selben gu^eter, die och min lehen wa^erint von im vnd sinem gotzhus ze sant Gallen, vfnemen wolti an sin hand vnd mir och die selben obgeschriben gu^eter vnd gelt bedú minen tail vnd och mines brůders tail ze ainem rehten lipding vnd in lipdings reht zů minem libe vnd niht fúrbas geben vnd lihen wolti, vnd von miner ernstlicher bett vnd och von manung wegen der getruwen willig gehorsam dienst, so ich vnd min vordem dem vorgeschriben gotzhus ze sant Gallen dik vnd vil getan hant vnd och ich noch wilklich vnd gern tůn wolti, do nam der vorgenant abt Cůn die vorgenanten gu^eter ha^elbi vnd allen minen taile letklich vnd frilich vff an sin hand vnd gab vnd verleh mir do^c) ze stund die selben gu^eter ellú min vnd och mines brůders tail mit allen rehten nútzzen vnd mit aller zůgeho^erd zů minem libe ze ainem rehten lipgedinge vnd in rehtes lipdinges wise vnd nit furbas, vnd och also mit der beschaidenhait vnd mit dem gedingde, das ich die selben gu^eter vnd gelt vnd bed tail ze ainem rehten lipgedinge haben vnd niessen besetzzen vnd entsetzzen sol, alle die wile ich leb, vnd wenn ich ab erstirbe vnd enbin, das dann nach minem tode die vorgeschriben gu^eter vnd och bed tail gentzlich vnd gar mit allen rehten vnd mit aller zůgeho^erd an stett letklich ledig los vnd genauen sint vnd sin sont dem vorgenanten abt Cůnen sinen nâhkomen vnd dem vorgeschriben sinem gotzhus ân aller mainglich sûmnûs irrung vnd wider rede ân alle geuerd. Vnd des vnd hierúber ze ainer wârhait aller vorgeschribner ding han ich Hainrich von Altstetten da vorgenant min insigel fúr mich vnd fúr min erben offenlich gehenkt an disen brief. Der geben ist ze Wil in der statt an dem na^ehsten donstag nach v´nsers herren vffart tag, do man zalt von gottes gebúrt drúzehenhundert jar, darnach in dem ain vnd ahtzigosten jar.

Source Fulltext: Chartularium Sangallense IX, Nr. 5843, S. 496-497.