Allen^a) den, die disen brief ansehent lesent oder ho^erent lesen, kúnd ich Cristoffel Maiger von Altstetten¹ kylchunherre der kylchun ze Lusteno^vw² vnd vergich || dez offenlich mit disem brieue, daz fúr mich kam ze Altstetten in der stat an dem na^ehsten ma^entag nâch sant Vrbans tag, do ich offenlich ze geriht saz, || die erber vnd wolbeschaiden fro Vrsulla vom Rosenhart³ hern Hainrichs sa^elgen von Altstetten⁴ wîlunt elichi tohter ze ainem tail vnd Hainrich von || Altstetten⁵ ir brůder ze dem andern tail, vnd offenot da die vorgenemt fro Vrsulla mit fúrsprechen offenlich vor mir an gemainem geriht vnd sprach, daz der obgenant Hainrich von Altstetten ir brůder an siner vnd an Walthers⁶ sines brůders stat von ir erlo^est vnd erledgot hett gantzlich vnd gar zwai phunt phenning gůter Costentzzer múnse ja^erliches geltes ab der múli, die man nemmet Schluphen múli, gelegen ze Altstetten an der Gebraitun⁷ vnd ain phunt phenning der vorgeschribenen múnse ja^erliches geltes ab dem wingarten, den man nemmet der Odrer, gelegen ze Altstetten, die selben drú phunt phenning geltes ir gewert phant wa^erint fúr drissig phunt vnd fúr zehen schilling phenning gůter vnd gena^emer Costentzzer múnse fúr iren tail vnd fúr irú reht alles dez erbes vnd erbschaft ligendes vnd varendes gůtes, ez wa^er von ir vatter ald von ir můter sa^elgen ald wie ez dar komen wa^er, der selben drissig phunt vnd zehen schilling phenning gůter Costentzzer múnse si gantzlich von im gewert wa^er vnd enphangen hett vnd an iren offenn nutz bewendet, vnd wo^elt sich o^vch dez selben phantschatz der driger phunt phenning geltes vnd aller der reht vordrung vnd ansprachen, so si von dez selben phantschatz wegen oder von tailes von gemainde von erbes ald von erbschaft wegen ligendes oder varendes gůtes, ez wa^er von ir vatter ald von ir můter sa^elgen ald wie ez dar komen wa^er, zv^o den vorgenemten Hainrichen vnd Walthern iren brůdern ie gehept hett ald hie nach iemer gehaben oder gewinnen mo^eht, willeklich verzihen gantzlich vnd gar fúr sich vnd alle ir erben, vnd bat mich mit irem fúrsprechen eruarn an ainer vrtail, wie si daz tůn so^elt vnd mo^eht, alz reht wa^er vnd daz ez kraft hett vnd haben mo^eht nv^ vnd o^vch hie nâch. Do frâgot ich vorbenemter rihter vrtail vmb vnd ward ertailt mit gemainer vrtail, daz si ainen vogt nemen so^elt an dem ring, wen si wo^elt, vnd daz si daz danne mit ir vnd mit dez selben ir vogtes handen vnd o^vch mit miner hant tůn vnd darnâch swêren so^elt ainen gelerten ait ze den hailigen, da wider niemer ze kommen noch ze tu^enne weder mit geriht noch ân reht, vnd daz ez danne also wol kraft vnd mäht hetti nach dem rehten. Do nam si ze vogt den . . Boler den Blârrer von sant Gallen iren o^ehain, vnd verzêch sich o^vch do die vorgenant fro Vrsulla vom Rosenhart offenlich vor mir vnd dem geriht willeklich frilich vnd vnbezwungenlich mit ir vnd mit dez obgenanten Bolers dez Blârrers ir vogtes handen vnd o^vch mit miner hand vnd verziht sich mit disem brieue gantzlich vnd gar fúr sich vnd alle ir erben gen den vorgenanten Hainrichen vnd Walthern von Altstetten iren brůdern vnd allen iren erben vnd nâchkomen aller der reht vordrung vnd ansprachen gaistlichs vnd weltlichs gerihtes, so si vnd ir erben, ob si enwa^er, zv^o den vorgenemten Hainrichen vnd Walthern iren brůdern ald zv^o iren erben, ob sú enwa^erint, von dez vorgeschribenen phantschatz der driger phunt phenning geltes wegen oder von tailes von gemainde von erbes ald von erbschaft wegen ligendes oder varendes gůtes oder lút, ez si von ir vatter ald von ir můter sa^elgen ald wie ez dar komen ist, ie gehept hât vntz vff disen húttigen tag, alz dirre brief ist geben, ald hie nâch iemer gehaben oder gewinnen mo^ehtint. Vnd swůr o^vch do die vorgenant fro Vrsulla vom Rosenhart offenlich vor mir vnd dem geriht willeklich frilich vnd vnbezwungenlich mit dez vorgenanten Bolers dez Blârrers ir vogtes willen ainen gelerten ait ze den hailigen mit v^f gehabenen vingern, daz si noch ir erben, ob si enwa^er, noch nieman andre an ir stat noch von ir wegen die vorgenemten Hainrichen noch Walthern ir brůder noch iro erben, ob sú enwa^erint, von dez vorgeschribenen phantschatz der driger phunt phenning geltes wegen noch von tailes von gemainde von erbes noch von erbschaft wegen ligendes noch varendes gůtes noch von dehainer lút wegen, ez sie von ir vatter ald von ir můter sa^elgen ald wie ez dar komen ist, niemer súllent noch wellent ansprechen v^f triben bekúmberren bekrenken noch in kain wîs beswa^eren weder mit gaistlichem noch mit weltlichem geriht noch ân reht noch mit enkainer lay ander sache ân alle geua^erde. Vnd ist diz alles beschehen vnd vollefu^ert reht vnd redlich mit allen den worten werken vnd geta^eten, so nâch gewonhait vnd nâch reht darzv^o gehortent ald ho^eren soltent vnd nôtdurftig wârent vnd alz ez kraft vnd maht sol vnd mag han. Vnd ze ainem waren vrkúnde vnd gantzzer sicherhait aller der vorgeschribenen dinge vnd vergiht so han ich Cristoffel Maiger rihter da vorgenemt von dez gerihtes wegen min insigel gehenkt an disen brief, won ez o^vch mit gemainer vrtail ertailt ward, daz ich ez tůn so^elt. Wir die vorgenemten Vrsulla vom Rosenhart vnd der . . Boler der Blarrer ir vogt in der vorgeschribenen sache veriehent ainer gantzzer wârhait aller der dinge vnd gedinge, so von v´ns an disem brief da vorgeschriben stânt, vnd ze merer sicherhait der selben dinge so haben wir o^vch v´nserú insigel gehenkt an disen brief. Darnach veriehent wir die nâchgenemten Eglolf von Altstetten⁸ closterherre dez gotzhus ze Pha^euers⁹ der vorgenanten Vrsellun brůder vnd Johans vom Rosenhart ir êlicher sun veriehent^b) offenlich mit disem brieue, daz alles daz, so an disem brief da vorgeschriben stât, mit v´nser baider gůtem willen gunst vnd verhengde beschehen vnd vollefu^ert ist vnd daz wir da wider niemer komen noch getůn súllent weder mit geriht noch ân reht, alz wir baid willeklich mit v´nseren trúwen fúr v´ns vnd fúr die obgenanten Vrsellun vom Rosenhart gelobt habent. Vnd ze mêrer sicherhait der selben dinge so haben wir o^vch v´nserú insigel gehenkt an disen brief. Der geben ist ze Altstetten an dem vorgeschribenen ma^entag in dem jâr, do man zalt von gottes gebúrt drúzehenhundert jar, sehszig jâr vnd darnâch in dem núnden jâre.

Source Fulltext: Chartularium Sangallense VIII, Nr. 5178, S. 346-348.