Waltherus dei gratia sancti Galli abbas¹ universis presentem paginam inspecturis salutem in eo, qui est iustorum omnium vera salus. | Quotiens opus agitur || pietatis, dignum est scripturis id memorialibus roborari, ut et quod factum est stabile perseveret et alii provocentur exemplo simili ad virtutem. | Noverint igitur universi presentem paginam || inspecturi, quod cum curia nostra in Esschans² dudum cum onere suo et eius redditibus fuisset pignori obligata, ut non solum monasterio nostro esset | inutilis, sed etiam perpetuo timeretur ami||tti, dilectus in Christo frater noster Burchardus prepositus³, indempnitati fratrum et ecclesie sue affectu pio cupiens providere, predictam curiam de manu Dietrici militis de Hasela⁴ redemit et eam monasterio nostro restituit penitus absolutam. Verum quia curia memorata, priusquam predicto^a) modo pignori traderetur, beneficium fuerat claustrale, solvens annuatim duo servitia fratribus in communi, placuit nobis totique nostro conventui, eamdem curiam ipsius prepositi relinquere ordinationi, ita ut quiquid idem de ipsa et de redditibus eius duceret statuendum, perpetuo servaretur. Porro prefatus prepositus non privato commodo sed communi potius^b) fratrum prospiciens consolationi taliter de prefata duxit curia simul et eius redditibus statuendum, ut ipsa cappelle sancti Johannis⁵, que similiter beneficium est claustrale, perpetuo sit annexa, frater vero, cui hec cappella in beneficium fuerit assignata, antiqua duo servitia superius memorata fratribus sicut olim ministrabit ratione videlicet curie huius cappelle ipsi de novo adiecte. Deinde prefatus prepositus considerationis sue oculum ad triplex bonum dirigens, quorum primum est, ut quedam festa, quorum apud nos condigna celebratio non extabat, honore debito peragantur, secundum est, ut fiat fratrum commemoratio in communi, sicut infra plenius distinguetur, tercium vero, ut communi proveniat consolationi, quod prius cessit unius commodo singularis, ita statuit, ut preter antiqua duo servitia, que supra memoravimus, predicte cappelle gubernator de pensione curie supradicte unum stopum in festo sancti Johannis ante Portam Latinam, secundum in octava sancti Johannis Baptiste, tercium vero in octava apostolorum Petri et Pauli, quartum autem in octava assumptionis beate virginis, que celebritates hactenus apud nos cum tribus tantum lectionibus agebantur, fratribus amministret, fratres autem celebritates ipsas festive decetero peragent et in albis. Item in octava sancti Martini singulis annis fieri debet ad altare sancti Benedicti6 fratrum commemoratio in communi cum missa pro defunctis et eo die similiter de residuo pensionis de prefata curia venientis unum sciatum fratribus tribuetur. Item et aliud sciatum, quod de quodam curtili retro domum suam sito idem prepositus in commemoratione Eberhardi Pistoris ac Maihtildis^c) uxoris sue fratribus ministravit, transtulit commoditatis gratia et id similiter curie imposuit supradicte, sicque predictarum consideratione causarum, quas re vera utiles esse prospexerat et honestas, prepositus sepedictus de quatuor stopis et duobus sciatis onus prefate curie ab antiquo impositum aggravavit. Nos igitur ordinationem huiusmodi ex multa ipsius prepositi Providentia institutam, cum eadem, que ipsum ratio movit, debeat nos movere, sicut est ydonea pia^d) utilis et honesta, de communi fratrum nostrorum consilio et assensu ratam habemus et modis omnibus confirmamus, adicientes in ipsius prepositi favorem et ut alios ad virtutis opera provocemus, ut de reliquo pensionis curie sepefate in Esschans in anniversario ipsius prepositi, quandocumque id occurrerit, decem sacerdotibus, quos infra nominabimus, decem solidi tribuantur⁷, videlicet sancti Petri⁸, beate virginis⁹, sancti sepulcri¹⁰, sancti Oswaldi¹¹, sancti Johannis⁵ et sancti Magni¹² sacerdotibus, item sancti Othmari¹³, sancti Laurentii¹⁴, sancti Leonardi¹⁵ et sancte Fidis¹⁶ ebdomadariis, qui pro tempore in predictis ecclesiis seu cappellis fuerint servientes, ut qui laborem sustinent, accipiant et emolumentum. Preterea ut maior aliorum crescat devotio, statuimus, ut predicti sacerdotes seu ebdomadarii singulos solidos accipientes eadem die pro anima ipsius prepositi missas singulas in locis suis cum pulsatione campanarum debeant celebrare, quibus celebratis mox ad chorum monasterii veniant, singuli singulos denarios oblaturi et usque ad finem misse ibidem communiter permansuri. Sacerdotes vero, qui de fratribus fuerint, cum per se denarios offerre non debeant, personis aliis eos tribuant offerendos. Ut ergo appareat hec sollemniter^e) acta et communiter approbata, sigilla videlicet tam nostrum quam capituli nostri presentibus litteris^f) sunt appensa. Acta sunt hec anno dominice incarnationis M°.CC°.XL.IIII°. indictione secunda.

Source Fulltext: Chartularium Sangallense III, Nr. 1348, S. 281-283.