S. prepositus de Curuvalde et V^ol. dictus de Juualt olim in prepositum Curiensem electus iudices a sede Magunt(ina) delegati viro provido et discreto L. plebano de Hugelnh(eim)¹ salutem et in Iesu Christo gratiam promereri. Cum in causa, que vertitur inter venerabiles in Christo abbatem et conventum monasterii sancti Galli ex parte una et abbatissam et conventum sororum de Oberriet ex altera, que nobis a sede Magunt(ina) dinoscitur esse commissa, partibus diem peremptorium legittimo dierum interstito prefixerimus coram nobis, pars sororum nec venit nec pro se mittere curavit. Quare nos easdem excommunicationis vinculo pro contumatia sua duximus innodandas, prefingentes nichilominus eisdem sororibus terminum alium similiter peremptorium, in quo, si vellent, defenderent coram nobis negotium principale, alio quin nos extunc procederemus contra ipsas, in quantum de iure possemus. Cuius sententie denuntiationem necnon citationis officium vobis tamquam viro industri ac deum timenti tunc meminimus commisisse. Verum dicte moniales in sua, quod non credebamus, contumatia perdurantes, nec venire nec pro se mittere procurarunt, quamvis a nobis secundo peremptorie sint citate, et quas obedientie normam aliis esse credebamus, facte sunt rebellionis exemplum, disciplinam ecclesiasticam contempentes, que timenda esset potius etiam minus iusta. Licet ergo propter crescentem ipsorum^a) contumatiam ad penam potuissemus ad presens procedere^b) graviorem vel etiam in principali negotio processisse, tamen, ne ad penam eorum^c) proni videremurd), quas magis adoptamus absolvere, et ut per patientiam nostram ad obedientie bonum valeant invitari, ecce tertio sepedictas abbatissam et conventum de Oberriet ad nostram presentiam evocamus in ecclesiam sancti Martini Curien(sem)² in proxima feria IIII^a. post festum Marci coram nobis causam suam legittime defensuras, alioquin, cum, ubi a sententia fuerit appellatum, in causa postmodum appellationis litis contestatio non speretur, nos extunc in principali negotio procedemus, in quantum de iure fuerit procedendum. Quia igitur iustitia dei ignavos refugit et in fortibus collocat sedem suam, nos volentes, ut exinde meritum nostrum crescat apud deum, auctoritate, qua fungimur, vobis iniungimus et mandamus, quatenus sepedictas dominas statim visis litteris iuxta supradictum modum ex parte nostra citetis et, ne diutius in excommunicatione ac contumatia sua sordeant, efficaciter inducere studeatis. Ego V^ol. de Iuualt proprium sigillum non habens sigillo decani mei³ usus sum. Dat. Curie proxima feria VI^a. post dominicam letare.

Source Fulltext: Chartularium Sangallense III, Nr. 1313, S. 251-252.