Allen den, die disen brieff sehent lesent oder ho^erent lesen, tůn ich Dietrich der Maier genemt von Alstetten¹ kunt vnd vergich offenlich an disem brieff fúr mich vnd fúr min erben alle, daz ich mit || gůter vorbetrahtung vnd beschaidenhait den wolbeschaiden mannen V^olrich vnd Gerwig den Blarern burger ze sant Gallen reht vnd redlich ze ko^vffen geben han Cůnrat Cristan von Alstetten, Adel||haiden sin elichen wirtinnen vnd iron kint, die sú ietz habent ald hernach gewinnent, mit lip vnd mit gůt, ez sie ligentz oder varndes gůt, ez sie genemt ald vngenemt, vmb sehszig phunt phen||ning gůter vnd ga^eber Costentzer múns, der ich gar vnd gantzlich von inen gewert bin vnd emphangen han, vnd die selben phenning an minen offenn nu^etz komen vnd bekert sint an den stetten, da ich minen schaden wahssenden mit verkomen han. Ich vergich och, daz ich die vorgescriben Cůnrat Cristan, Adelhaiden sin wirtinnen vnd irú kint an ir gůt, ez sie ligentz oder varndes ald lehen, die sie von mir hant, niemer irren noch sumen sol, sie sullent vnd habent gewalt mit ze schaffenn vnd ze tu^enne gen menlichem, waz inen nútz vnd gůt ist, mit verko^vffen ald mit versetzzen, vnd sol och inen daz selb gůt entrîchen vnd ledig machen, wo ez hafft ist vntz an disen húttigen tag, vnd darumb so enzihe ich mich vnd hab enzigen mit disem brieff fúr mich vnd fúr alle min erben aller der reht vnd ansprach, die ich hatte ald han moht an die vorgescriben Cůnrat Cristan, Adelhaiden sin wirtinnen vnd an irú kint vnd an ir gůt, ez sie ligentz oder varndes, von aigenschafft ald von lehens wegen. Geschêhe aber, daz ich ald ieman von minen wegen ald an miner stat kain ansprach ald vordrung iemer gewunnent ald hettent an gaistlichem ald an weltlichem geriht an die vorgescriben Cůnrat Cristan, an Adelhaiden sin wirtinnen, an irú kint vnd an ir gůt, ez sie ligentz oder varndes, die ansprach vnd vordrung sol alle vnnútz vnd vnkrefftig sin vnd der vorgescriben sach vnsche^adlich. Ich vergich och, daz ich den vorgescriben V^olrich vnd Gerwig den Blarern die vorgescriben Cůnrat Cristan, Aldelhaiden^a) sin wirtinnen, irú kint vnd ir gůt geuertgot han, als reht sitt vnd gewonlich waz, mit dez erwirdigen mines gena^edigen herren hant abt Herman abt dez gotzhus ze sant Gallen². Ich vergich och, daz ich vnd min erben der vorgescriben V^olrichz vnd Gerwiges der Blarer vnd ir erben, ob sie enwa^erent, reht wem súllent sin nach reht vmb die vorgescriben lút vnd ir gůt gen aller menlichem, da ez inen notdurfftig ist an gaistlichem vnd an weltlichem geriht, vnd daz ich vnd min erben wider den vorgescriben dingen niemer tu^egent mit worten noch mit werken noch mit kainer slaht sach. Darumb enzihe ich mich vnd hab enzigen mit disem brieff fúr mich vnd fúr alle min erben alles schirmes, aller frihait, aller helf gaistliches vnd weltliches geriht vnd alles des, da mit die vorgescriben V^olrich vnd Gerwig die Blarer bekrenkt mo^ehten werden in kainen weg vmb die vorgescriben lút vnd gůt, vnd ist dis alles beschehen vnd vollefu^ert mit allen den worten vnd werken, so man phligt vnd phlegen sol in semlichen sachen. Vnd ze ainer ste^ater sicherhait aller^b) der vorgescriben ding so han ich der vorgenemt Dietrich der Maier min insigel gehenkt an disen brieff fúr mich vnd fúr alle min erben. Dis beschach vnd wart dirre brieff geben ze sant Gallen in der stat, an dem na^ehsten samhstag nach sant Nycolaus tag, do man zalt von gottes gebúrt drúzehenhundert jar, vierzig jar vnd darnach in dem andern jar.

Source Fulltext: Chartularium Sangallense VI, Nr. 3831, S. 394-395.