Allen den, die disen brief an sehent lesent oder ho^erent lesen, kúnden wir Růdolf vnd Eglolf von Rosenberg, || die man nemmet von Zukenriet¹, gebrůder vnd veriehint offenlich an disem brief, dz Růdolf der Senne || von Appwille² burger ze sant Gallen, der v´nser lehen wz von dem gotzhus ze sant Gallen, sich selber sinen lib || vnd alles sin gůt, dz er het ald er hie nach immer gewinnet, reht vnd redelich von v´ns gekoffet het vnd von v´nseren erbun an daz gotzhus ze sant Gallen vmb nún pfund gůter vnd genger Costentzer pfenning, der selbun pfenning wir alleklich vnd gar gewert sint vnd da mit wir v´nsern grôssen schaden verkomen vnd gewendet habint. Vnd habint och wir obgenanden von Rosenberg gebrůder den selben Růdolf Sennen willeklich ledeklich reht vnd redelich mit sinem lib vnd gůt vff geben vnd geferteget an dez êrwirdigen v´nsers gena^edigen herren hand abt Hermans dez gotzhuses ze sant Gallen³ ze dez selben gotzhus nútz vnd handen mit allen den worten werchen ra^eten geba^erden vnd mit aller gewarsami vnd ehafti, so dar zů horte nútz gůt ald notdúrftig waz von reht ald von^a) gewonhait. Vnd habint och wir vorbenempten von Rosenberg gebrůder willeklich gelobt mit v´nseren gůten trúwan vnd bindint och v´nser erben dar zů mit disem brief, dz wir ane allen fúrzug vnd ane alle wider rede dez vorgescribenen koffes vnd och Růdolfs dez vorbenempten Sennen reht wern so^ellint vnd wellint sin nach reht, wenn ald wa sin an herre ald daz capitel ald pfleger ald amptlút dez gotzhus ze sant Gallen ald Růdolf der vorbenempt Senne ald sin erben sin bedurfent ald notdúrftig sint vff gaistelichem ald vf weltelichem geriht. Vnd entzihint vnd habint v´ns och entzigen mit disem brief fúr v´ns vnd fúr alle v´nser erben vnd nachkomen aller der reht vorderung ansprach lehenschaft aigenschaft besatzung kuntschaft vnd aller zúgnúst brief vnd lút, so wir ald v´nser erben ald nachkomen an dem ald vmb den vorbenempten Růdolf Sennen ald zů sinem gůt ie hettint ald gewnnent ald wir dar an ald dar zů hie nach immer han ald gewinnen mugint ald mo^ehtint von reht ald von gewonhait ald an reht dehainen weg. Vnd ze merer sicherhait aller vorgescribener ding henken wir v´nserú insigel baide an disen brief. Der geben ist an dem na^ehsten ma^entag vor sant Barnabas tag in dem brachot, do man zalte von gottes gebúrt drútzehenhundert jar, dar nach in dem siben vnd fúnfzigosten jare.

Source Fulltext: Chartularium Sangallense VII, Nr. 4482, S. 335-336.