Allen^a) den, die disen brief an sehent lesent oder ho^erent lesen, kúnden wir diz nâchgenempten Růdolf Kylchhofer brobst dez gotzhuses ze sant Johans¹ sant Benedicten || ordens in Costentzer bistům vnd Cůnrat Kylchhofer von Flâwille² sin êlicher brůder vnd veriehent dez offenlich mit disem brieue fúr vns vnd fúr alle vnser || êrben vnd nâchkomen, daz wir mit gůter vorbetrahtung vnd mit wolbeda^vhtem můte recht vnd rêdlich den bra^vchzehenden gelegen ze Swartzenbach³ v´beral ||, der vnser lehen gewesen ist von dem êrsamen frijem herren Hainrichen von Hewen⁴, mit allen rechten verko^vffet vnd ze ko^vffen geben hant dem beschaiden Hainricen Eberhart vnserm frúnde burger ze sant Gallen vnd sinen êrben, ob er enwa^er, vmb fiertzig phunt vnd fúnf phunt phenning gůter Costentzer múnse, der wir gantzlich von im gewert sient vnd da mit wir vnsern grossen schaden verkomen hant, den selben vorgeschriben bra^vchzehenden mit allen sinen rechten nútzen vnd zůgeho^erden hant wir im frylich willeklich recht vnd rêdlich vf geben geuertigot vnd ze sinen handen bra^vht mit dez obgenanten hern Hainrichs von Hewen vnd mit vnsern handen, als recht sitte vnd gewonlich waz vnd als es kraft vnd maht sol vnd mag han nu vnd o^vch hienâch. Vnd dar vmb so haben wir vns baid willeklich vnd frylich verzigen vnd verziehent vns mit vrkúnde diz brieues gar vnd gantzlich fúr vns vnd fúr alle vnser êrben vnd nâchkomen dez vorgeschriben bra^vchzehenden gelegen ze Swartzenbach v´beral mit allen sinen rechten nútzen gewonhaiten vnd zůgeho^erden aller aigenschaft aller manschaft aller lêhenschaft aller kuntschaft aller gewêr lúten vnd brieuen alles gaistlichen vnd weltlichen rechtes aller vordrunge vnd anspra^vchen aller recht vnd rechtung, so wir oder vnser êrben ald nâchkomen an dem vnd zů dem vorgeschriben bra^vchzehenden wegen ie gehebt hant ald hie nâch iemer mêr gehaben oder gewúnnen mo^ehtint, vnd daz wir noch vnser êrben ald nâchkomen noch nieman andre an vnser statt noch von vnsern wegen den vorgenempten Hainricen Eberhart noch dehain sin êrben von dez vorgeschriben bra^vchzehenden noch dekainer siner zůgeho^erde wegen niemer mêr súllent noch wo^ellent ansprechen vftriben bekúmberren bekrenken noch in dehain wise beswa^eren weder mit gaistlichem noch mit weltlichem gerichte noch ân gericht noch mit dekainerlay ander sache ân gefa^erde. Wir habent o^vch baid gelobt mit vnsern trúwen vnd lobent mit vrkúnde diz brieues, dez vorgeschriben bra^vchzehenden vnd o^vch dez ko^vffes recht wern ze sinne nâch lêhens recht vnd den obgenanten Hainrice Eberhart dâr vmb ze versprechen vnd ze versta^enne an allen stetten gen aller ma^englichem ân allen sinen schaden, wenn wa vnd wie dik er oder sin êrben dâr vmb angesprochen ald vfgetriben werdent, ân gefa^erde. Vnd dez ze offenem wâren vrkúnde vnd sta^eter sicherhait aller dirre vorgeschribenen dinge vnd gedinge so han ich Růdolf Kylchhofer brobst da vor genempt min insigel fúr mich fúr den obgenanten Cůnraten Kylchhofer minen brůder, won er aigens insigels nút hatt, vnd fúr alle vnser êrben vnd nâchkomen offenlich an disen brief gehenket, vnder daz selb insigel ich ietzgenempter Cůnrat Kylchhofer mich willeklich gebunden han aller dirre vorgeschriben dinge vnd gedinge, won ich aigens insigels nút hatt. Dirre brief wart geben ze sant Gallen, do von Cristus gebúrt wârent drútzehen hundert jâr, sibentzig jâr vnd dar nach in dem fúnften jâre, an sant Johans âbent dez To^vffers ze sunnwendi.

Source Fulltext: Chartularium Sangallense IX, Nr. 5462, S. 134-135.