Wir^a) graue Kraft von Toggenburg¹ kilcherre der kilchen ze Swarzenbach² in Costenzer bistom kúnden || allen, die disen brief sehent oder ho^erent lesen, das v´nser vndertan ze der vorgenanden v´nser kilchen mit || v´nser gunst vnd willen gezwijet habent nussebo^vme vnd habent o^vch můt fúrbas ze zwijenne solich bo^vme in || dem kilchoue der vorgenanden v´nser kilchen durch das, das dú selb v´nser kilche gotte ze lobe vnd ze eren deste bas belúchtet werde, also was frúchten vnd was nutzes von den bo^vmen, die jetze da stant oder noch da gezwijet werdent, das die die kilchmeier der selben kilchen bekeren in der selben kilchen liechtes nutz, als si sich bi ir eren versehen, das es dem liechte der vorgenanden v´nser kilchen aller nutzberest sie, es si, das man die nusse ze o^ele mache oder das man die nusse verko^vffe vnd da mit o^ele ko^vffe, als verre die nusse nach werde gelangen mugen nach der iarzit vnd nach gemeinem ko^vffe. O^vch sun die kilchmeier der vorgenanden v´nser kilchen beschirmen vnd fúrbas bringen die selben bo^vme mit v´nser, v´nser nachkomen vnd vndertan hilfe, die wir da zů binden, durch das, das dú vorgenant v´nser kilche, als verre der vorgenanden nusbo^vmen nutz gelangen mag, eweklich belúchtet si. Vnd ze einem offen vrkúnde alles des, so vorgeschriben stat, geben wir disen brief besigelt mit v´nserm ingesigel offenlich. Dis geschach vnd wart o^vch dirre brief geben Zúrich, do man von gottes gebúrte zalte drúzehenhundert iar, dar nach in dem sechsten vnd drissigosten iare, an aller selen tage.

Source Fulltext: Chartularium Sangallense VI, Nr. 3634, S. 240.