Hainricus dei gratia abbas¹ totusque conventus monasterii sancti Galli ordinis sancti Benedicti Constanciensis dyocesis omnibus presentium inspectoribus salutem cum noticia subscriptorum. || In rebus gestis aufertur litis occasio et dubitationis, cum ipse litterarum intersigno posterorum memorie declarantur. Noverint igitur universi, quos nosse fuerit oportunum, quod cum || vir discretus dominus Ottode Ainwille² rector ecclesie in Rumashorn³ veniens ad presentiam nostri saluti sue anime prospicere intenderet, terciam partem decime ville dicte || in dem Holtz⁴, quam ipse et sui consanguinei de Ainwille a nostro monasterio in feodum perpetuum diu tenuerant possidentes, accedente consensu Waltheri, Cůnradi, Burchardi, Růdolfi dictis^a) de Ainwille⁵, quibus ius hereditarie successionis dicte decime ratione legationis eisdem a dicto Ottone per manus nostras facte pertinuit, cum omni iure et utilitate, que sibi in ipsa conpetebant seu conpetere videbantur, dedit et tradidit pure libere et irrevocabiliter sacerdoti facienti officium dicte ecclesie in Rumashorn nomine prebende deputate clerico in eadem celebranti in perpetuum possidendam, et cum alienatio feodi sine consensu domini roboris careat firmitate, nobis prefatus Otto humiliter supplicavit, ut predicte donationi facte nostrum pium assensum inpertiri digneremur, dictum sacerdotem nomine prenotate prebende resignatione libera a prefato Ottone facta de dicta decima infeodando seu etiam investiendo. Nos vero attendentes, quod summa est ratio, que facit pro augendo divino servitio, dicte donationi favorabiliter inpertientes assensum recepta resignatione libera a prefato Ottone de decima memorata, predictum sacerdotem nomine prefate prebende investivimus seu infeodavimus, adiecta condicione infrascripta scilicet, ut prememoratus sacerdos in nullo tempore postfuturo in alia ecclesia vel capella cum cura seu sine cura animarum existenti presumat amministrationem gerere divinorum, sed siquis sacerdos inposterum huius conditionis seu pacti transgressor existat, premonitus infra spacium mensis a tali transgressione desistere negliendo, quo vel quibuscumque annis hoc fuerit, eodem vel eisdem annis fructus seu proventus decime prenotate redire debent ad nostri monasterii operis decanatum. Ut autem dicta donatio^b) in nulla sui parte umquam valeat infirmari, ipsam in perpetuam firmitatem nostri sigillorum munimine duximus roborandam. Acta autem est hec traditio et facta anno domini M°.CCC°.VI°. XIII°. kl. septembris, indictione IIII^a., presentibus et ad hoc in testes vocatis Cůnr. pincerna de Landeg⁶ milite, domino Hugone de Albrehtswille⁷, domino Alberto dicto Vischer, Egelolfo rectore ecclesie sancti Laurentii⁸, magistro H. de sancto Gallo⁹, C. Kamerario, dicto Gugillin^c), V^olr. dicto Spa^eten, Egelolfo dicto Omin¹⁰, Alberto dicto Rankwil, C, Jacobo, C. et Jo. dictis Blarrer, Volkardo dicto Roggwiller et C. dicto Vo^elin.

Source Fulltext: Chartularium Sangallense V, Nr. 2657, S. 118-119.