Wir Ru^egde^a) von Hegi von gotz verhengde probst vnd das cappitel gemainlich des gotzhus ze V´ttingen¹ sant Augustinus ordens in Costentzer bystum veriehen vnd tůn kunt offenlich mit disem || brief allen, die in an sehent oder ho^erent lesen, das wir ainhelklich mit gůter vorbetrahtung vnd beschaidenhait nach v´nser vo^egt vnd ander v´nser vnd v´nsers gotzhus getrúwen rât von v´nser || vnd v´nsers gotzhus kúmberhafti vnd redlichen not wegen verkoft haben das gůt gelegen ze Wengi² genemt des Brantz gůt, den zehenden ze Haiterschan³, den zehenden ze Wengi vnd den || zehenden in dem Wille⁴, die v´nser vnd v´nsers gotzhus reht aigen warent, vnd haben ze koffenn geben fúr v´ns vnd fúr alle v´nser nahkomen vnd fúr das vorgedaht v´nser gotzhus mit allen rehten nútzzen vnd gewonhaitten vnd mit allem dem, so von gewonhait vnd von rehtt zů dem selben gůt vnd zehenden vnd darin geho^ert vnd als wirs vnd v´nser vordem bis hêr gehebt vnd genossen haben, ains rehten besta^eten redlichen ewigen kofs fúr reht ledig aigen dem erwirdigen gaistlichen heirren^a) in got abt Hainrichen des gotzhus ze sant Johann in Turtal⁵ gelegen sant Benedichten ordens in Costentzer bystum sinen nahkomen vnd dem selben sinem gotzhus vmb hundert pfunt vmb fúnfzig pfunt vnd vmb sehs pfunt pfenning alles gůter vnd gena^emer Costentzer múns, der selben pfenning wir aller gar vnd gentzlich von im sint gewert vnd bezalt an den stetten, da wir v´nsern vnd v´nsers gotzhus wahsenden schaden mit verkomen vnd gewendet haben. Wir haben och gemainlich vnd ieglicher besunder vnder v´ns dem vorgenanten abt Hainrichen das vorgeschriben gůt vnd zehenden mit allen vorgeschriben rehten nútzzen vnd gewônhaitten vnd mit aller zůgeho^erd fúr reht ledig aigen vfgeben geuertegot vnd zů siner vnd siner nahkomen vnd des vorgedahten sins gotzhus handen brâht, als reht sitt vnd gewonlich was. Wir haben och den selben abt Hainr. vnd sin gotzhus des vorgeschriben gůtes vnd zehenden mit allen obgeschriben rehten nútzzen vnd mit aller zůgeho^erd in liplich nutzlich gewer gesetzt vnd setzzen och wissentlichen mit disem brieue fúr v´ns fúr alle v´nser nahkomen vnd fúr das obgeschriben v´nser gotzhus ân alle geuerd. Wir haben och alle gemainlich vnd ieglicher besunder vnder v´ns gelobt mit ainhelligem sinn vnd můt vnd lobent och mit vrkúnd dis briefs fúr v´ns fúr alle v´nser nahkomen vnd fúr das vorgeschriben v´nser gotzhus, des vorgenemten abt Hainrichs siner nahkomen vnd des vorgedahten sins gotzhus des vorgeschriben gůtes vnd der zehenden mit aller zůgeho^erd vnd och des kofs reht wer ze sinne fúr reht ledig aigen gen aller mainglichem vff gaistlichem vnd vff weltlichem gericht vnd an allen den stetten, da inen das notdúrftig ist, vnd och wenn wa vnd als dik sú vnd ir gotzhus des bedurfent vnd notdúrftig sint ald darumb angesprochen oder vf getriben werdent, das wir vnd v´nser nahkomen sú vnd das vorgedaht ir gotzhus darumb nach reht versprechen verstan vnd von der ansprach entrihen vnd ledig machen sont ân fúrzug vnd gentzlich ân irn schaden. Ta^etint wir des niht, wie sú denn des ze gewonlichem schaden koment, von dem schaden sont wir sú gentzlich lo^esen ân irn schaden ân geuerd. Vnd won wir den selben koffe also vngeuarlich mit gůtem willen vnbetwungenlich vnd och ainhelklich mit gemainem rât durch nûtz vnd fúrdrung v´nser vnd v´nsers gotzhus gen dem selben abt Hainrichen getan vnd volfu^ert haben, so haben wir v´ns alle gemainlich vnd ieglicher besunder vnder v´ns fúr v´ns fúr alle v´nser nahkomen vnd fúr das vorgeschriben v´nser gotzhus letklich vnd frilich entzigen gen dem selben abt Hainrichen gen allen sinen nahkomen vnd gen dem vorgedahten sinem gotzhus vnd entzihent v´ns och gar vnd gentzlich mit disem brief an dem vorgeschriben gůt vnd zehenden mit aller zůgeho^erung aller aigenschaft aller manschaft aller kuntschaft aller besatzzung aller gewer zúgnust lút vnd brief vnd mit namen des rehten, den^a) man spricht gemain verzihen verfâh nit, vnd des rehten, den^a) man spricht ins porrechtûm, vnd des rehten, da mit man versertú gotzhúser wider bringen vnd ze hilf komen mag, vnd des rehten, da mit wir sprechen mo^ehtint, das wir an dem koffe betrogen wa^erint in dehain wis ald das wir des geltes gentzlich niht bezalt wa^erint, vnd och alles rehten vnd aller gesetzt und gewônhait der ba^ebst vnd der kayser vnd aller dero, die vnder denan sint, vnd och aller vordrung vnd ansprach vnd alles rehten gaistlichs vnd weltlichs gerichtes, da mit wir ald v´nser nahkômen oder ieman andrer von v´nser vnd v´nsers gotzhus wegen das vorgeschriben gůt vnd zehenden mit aller zůgeho^erd nv ald hernach gar oder an dekainem taile oder den vorgenanten abt Hainrichen oder sin nahkomen oder das vorgeschriben sin gotzhus von des selben gůtes vnd zehenden wegen kv´ndint ald mo^ehtint angesprechen ald damit wir oder v´nser nahkômen den selben koffe wider bringen ald ze niht machen in dehain wis mo^ehtint, ân geuerd. Vnd ist dis alles redlichen vnd reht beschehen volfu^ert vnd volbraht mit aller ordnung worten werken geba^erden vnd geta^eten, so darzů gehortent nútz gůt vnd notdúrfig warent von gewonhait vnd nach rehte vnd als es kraft vnd maht hat vnd haben sol vnd mag nv vnd hernach. Vnd des vnd hierúber ze ainer sta^eten vesten sicherren warhait aller vorgeschribener ding vnd gedingde haben wir Ru^edge von Hegi probst da vorgenant vnd das cappitel gemainlich des gotzhus ze Yttingen v´nser vnd v´nsers gemainen cappitels insigel fúr v´ns vnd fúr alle vnser nahkomen offenlich gehenkt an disen brief. Der geben ist ze Yttingen in v´nserm gotzhus an dem na^ehsten fritag nach dem hailigen tag ze pfingsten, do man zalt von gottez gebúrt drúzehenhundert jar, sibentzig jar, darnach in dem sehsten jar.

Source Fulltext: Chartularium Sangallense IX, Nr. 5511, S. 182-184.