Wir die lantlút gemainlich, die in dú zwai a^empter ze Appacelle¹ vnd ze Huntwîlle² geho^erent, tůn kunt vnd veriehent offenlich mit disem brieue || allen, die in ansehent lesent oder ho^erent lesen, von der sto^esse vnd misshellung wegen, die wir gehept habent vntz her vff disen húttigen tag, alz dirre || brief ist geben, mit dem erwirdigen vnserm gna^edigen herren abt Georien abt dez gotzhus ze sant Gallen³, der selben sto^ess vnd misshellung v´ns || diz nâchgenemten fúnf Hugo Schůlmaister burgermaister der stat ze sant Gallen⁴, Andres Entzziswiller, Hainrich Ko^echler, Blarrer Sta^ehelli vnd Hainrice Garnleder der schriber von der ra^et vnd der burger gemainlich der stat ze sant Gallen vnd o^vch von vnser bett wegen lieplich vnd gu^etlich mit dem obgenanten vnserm herren abt Georien v´ber ain braht vnd verriht hant, habent wir alle gemainlich vnd mit ainberem willen gesworn nach der vorgenanten fúnfen haissen ainen gelerten ait ze den hailigen mit v^f gehabenen vingern, daz wir niht gemainlich noch der mer tail vnder v´ns enhainen vfbruch vnder v´ns niemer machen súllent noch v´ns niht gemainlich noch der mêr tail vnder v´ns mit burgreht noch mit puntnust zv^o nieman durch můtwillen verbinden noch verpflihten súllent, alle die wîle der obgenant v´nser herre abt Geori lebt, weder in dez gotzhus noch in dez rîchs stett noch hinder dehain ander hêrschaft ân alle geua^erde, von dehaines gebresten noch sachen wegen, die wir in den selben zwain a^emptern vnder v´ns selber v´ber obern vnd gewenden mugent. Bescha^ech aber, daz got niht welle, daz wir alle gemainlich ald der mer tail vnder v´ns da wider ta^etint vnd den ait, den wir gesworn habent, also v´berfu^erint, wenn daz bescha^ech, so hât der obgenant v´nser herre abt Geori vnd sin helffer, wer die sint, friges vrlob vnd vollen gewalt, darnâch wenn sú wellent alle die, die danne daran v´beruarn vnd gebrochen hettint, ze phendenn ze no^etenn ze heftenn vnd an ze griffenn an lip vnd an gůt vff dem land vnd in den stetten mit gaistlichem vnd mit weltlichem geriht vnd ân geriht, wie vnd wâ sú daz getůn mugent. Vnd sol o^vch danne die selben, die v´beruarn vnd gebrochen hettint, noch dehain iro gůt hie vor noch hie wider niht schirmen noch gůt sin kam frihait kain gewonhait kain burgreht kain puntnust kain lantfrit noch kain reht dez landes noch der stette gaistlichs noch weltlichs gerihtes noch kain ander sach noch fúrzug. Wa^er o^vch, daz sich ieman in den vorgeschribenen zwain a^emptern zv^o ain ander verbunden hettint vntz her vff disen húttigen tag, alz dirre brief ist geben, ez wa^er mit gelúbt oder mit aiden, die selb puntnust gelúbt vnd aide sont o^vch gantzlich ab sin. Ez sol sich o^vch hinnenhin, die wile der obgenant v´nser herre abt Geori lebt, in den vorgeschribenen zwain a^emptern nieman ze samen verbinden durch můtwillen weder mit gelúbt noch mit aiden noch mit dehainen andern sachen, ân alle geua^erde. Die vorgenemten fúnf hant o^vch gehaissen vnd gesprochen, daz aller der schad, den wir in den vorgeschribenen zwain a^emptern biz her vff disen húttigen tag, alz dirre brief ist geben, genomen vnd enphangen habent, ez sie von vnserm herren dem probst, von Walther dem Maiger sa^elgen von Altstetten⁵, von Eglolf von Altstetten⁶ oder von dem To^ebeller, gantzlich vnd gar ab sin sol vnd daz wir dem vorgenanten vnserm herren abt Georien hinnenhin darumb niht zv^o sprechen súllent. Vnd ze ainem wâren vrkúnde vnd gantzzer sicherhait aller der vorgeschribenen dinge vnd vergiht so haben wir gebetten die vorgenemten fúnf, die o^vch diz vorgeschribenen rihtung gemachot hant, daz sú irú insigel fúr v´ns gehenkt hant an disen brief. Wir die vorgenemten fúnf Hûg Schůlmaister burgermaister ze sant Gallen, Andres Entzziswiller, Hainrich Ko^echler, Blarrer Sta^ehelli vnd Hainrice Garnleder burger ze sant Gallen veriehent offenlich mit disem brieue, daz wir von ernstlicher bet wegen der vorgedahten lantlút gemainlich ze Appacelle vnd ze Huntwille, won wir o^vch die vorgeschribenen rihtung gemachot hant, v´nserú insigel fúr sú gehenkt habent an disen brief. Der geben ist ze Appacelle zv dem hof in dem jâr, do man zalt von gottes gebúrt drúzehenhundert jâr, sehszig jâr vnd darnach in dem sibenden jâre, an dem na^ehsten sunnentag vor sant Gallen tag.

Source Fulltext: Chartularium Sangallense VIII, Nr. 5094, S. 272-273.