Wir Herman von gottes vnd des stůls gnaden ze Rôme besta^eter abt des gotzhus ze sante Gallen¹ tůn kunt vnd veriehen || offenlich an disem brieue allen, die in ansehent lesent oder ho^erent lesen, das fur v´ns kam der êrsam wolbeschaiden Cůnrat der Rise || burger ze Wîle² mit Adelhait siner êlichun wirtenne³ vnd mit sinen tohtran Vrsullun, Adelhait, Annun vnd Agnêsun, vnd || der selb Cůnrat der Rise mit gůter vorbetrahtunge vnd beschaidenhait reht vnd redlich mit v´nser hant gunst willen vnd verhengde die zehenden von beden ho^euen ze Brûnberg⁴, die er kôfte von v´nserm lieben burger V^olrich Stapflin vnd sîn lehen sint von v´ns vnd von v´nserm gotzhus, mit allen rehten nútzen vnd gewonhaiten, die darzů vnd darin geho^erent, versatzt vnd versetzet hât der vorgenemtun Adelhait siner êlichun wirtenne vnd den vorbenemtan sinen tohtran Vrsullun, Adelhait, Elsbethun⁵ vnd Agnêsun gemainlich vnd vnuerschaidenlich ze ainem rehten redlichen gewerten pfande fur drisseg march vnd fur siben march gůtes vnuersprochens silbers Kostentzer gewiht. Vnd ist dis geschehen reht vnd redlich mit allen den worten vnd werchen, so darzů gehort vnd nôtdúrftig was von reht vnd ouch von gewonhait. Vnd ze ainem wâren vrkúnde vnd ze ainer sta^etun sicherhait der vorgeschriben dinge henken wir v´nser insigel an disen brief. Der geben ward ze Wîl in v´nser stat, do man zalt von gottes geburt drúzehenhundert jâr, viertzeg jâr, darnah in dem ersten jâr, an sant Alexius tage.

Source Fulltext: Chartularium Sangallense VI, Nr. 3782, S. 356-357.