Allen^a) den, die disen brief an sehent lesent oder ho^erent lesen, tůn ich Cůnrat von Múnchwille¹ sesshaft ze Vrouenuelt² kunt vnd vergih des offenlich mit disem brief, || daz fúr mich kam der erber kneht Cůnrat Diepfurter von V^otenwille³ mit Cůnraten von Růpreswille⁴, vnd offent vnd veriah da der selb Cůnrat Diepfurter || offenlich vor mir vnd sprach, das er mit bedahtem můt durch sin redlichen notdurft verkoft hetti den akker vnd dú wisen gelegen ze Růpreswille, || der aker gelegen ist ob Bisenbu^el⁵ bi dem hag vnd dú wis gelegen ist bi dem hof ze Růpreswille genant des Diepfurters wis, der selb akker vnd dú wis sin lehen von mir wa^erint, vnd hetti ze koffenn geben fúr sich vnd fúr alle sin erben ains rehten besta^eten redlichen vngeuarlichen ewigen kofs mit allen rehten nútzzen vnd gewônhaitten vnd mit allem dem, so von gewônhait vnd von rehte zů dem selben akker vnd der wisen vnd darin geho^eret, dem vorgenanten Cůnraten von Růpreswille vnd sinen erben, ob er ênwa^er, vmb fúnf vnd drissig schilling pfenning alles gůter vnd gena^emer Costentzer múns, vnd wa^er och der selben pfenning aller gar vnd gentzlich von im gewert vnd bezalt an den stetten, da ers in sinen schinbaren redlichen nutz geben vnd bewendet hetti. Vnd nah dem do gab mir do ze stund der vorgenant Cůnrat Diepfurter mit gůtem friiem willen die vorgeschriben akker vnd och die wisen mit allen obgedahten rehten nútzzen vnd gewônhaitten vnd mit aller zůgeho^erd letklich vnd frilich vf an min hand vnd batt michs ze lehen lihen dem vorgenanten Cůnrat von Růpreswille. Das tett ich durch sin bett vnd han mit wolbedahtem můt den vorgeschriben akker vnd och dú wisen mit allen rehten nútzzen vnd mit aller zůgeho^erd verlihen dem vorgenanten Cůnrat von Růpreswille vnd lihe och wissentlich vnd reht vnd redlich mit disem brief ze rehtem lehen ân alle geuerd. Och verzeh do der vorgenant Cůnrat Diepfurter wilklich vnd frilich vor mir fúr sich vnd fúr alle sin erben vnd enziht sich och gentzlich vnd gar mit disem brieue gen dem vorgenanten Cůnraten von Růpreswille vnd gen allen sinen erben an dem vorgeschriben akker vnd och der wisen mit aller zůgeho^erd aller aigenschaft aller lehenschaft aller kuntschaft aller besatzzung aller zúgnust aller gewer lút vnd brieue aller vordrung vnd ansprach vnd och alles rehtes gaistliches vnd weltliches gerichtes, da mit er oder sin erben oder ieman andrer von ir wegen vnd an ir statt den selben akker vnd och dú wisen mit aller zůgeho^erd nv ald hernach gar oder an dekainem taile iemer kúndint ald mo^ehtint ansprechen in dekain wis ald mit dekainen andren sachen, ân geuerd. Der vorgenant Cůnrat Diepfurter hat och gelobt fúr sich vnd fúr alle sin erben, des vorgenanten Cůnraten von Růpreswille vnd siner erben des vorgeschriben akkers vnd och der wisen mit aller zůgeho^erd vnd des kofs reht wer ze sinne nah reht gen mainglichem vff gaistlichem vnd vff weltlichem geriht, wenn wa vnd wie dik sú des bedurfent vnd notdúrftig sint, ân alle geuerd. Vnd ist dis alles redlichen vnd reht beschehen volfu^ert vnd volbraht mit allen worten werken geba^erden vnd geta^eten, so darzů gehortent vnd geho^eren mohtent von gewonhait vnd von rehte vnd als es kraft vnd maht hat vnd haben sol vnd mag nv vnd hernach, ân geuerd. Vnd dez vnd hierúber ze ainer warhait aller vorgeschribener ding vnd gedingde han ich Cůnrat von Múnchwille da vorgenant min insigel offenlich gehenkt an disen brief. Der geben ist ze Vrouenuelt in der statt an v´nser vrowen abend ze mittem ôgsten, do man zalt von gottes gebúrt drúzehenhundert jar, sibentzig jar, darnach in dem sibenden jare.

Source Fulltext: Chartularium Sangallense IX, Nr. 5602, S. 274-275.