Ich^a) Burkart von Ramswâg hern Burkartz sa^elgen sun von Ramswâg tůn kunt vnd vergich dez offenlich an disem brieue fúr mich vnd fúr Cůnrat V^olrichen vnd Burkart Dietrichen min êlichen sún || vnd fúr alle min erben vnd nâchkomen allen, die in ansehent lesent oder ho^erent lesen, daz diz nâchgeschriben ja^erlich gelt, von der kylchen ze Kylchberg siben pfunt pfenning geltes, von dem || kelnhof ze Húttiswille sechs pfunt pfenning, zwai hundert ayer vnd vier vnd zwainzig hu^enr geltes, von dem kelnhof ze Rumashorn sibenzehen mut vnd zwai viertail kernen vnd ainlof || malter haber geltes, von dem kelnhof ze Gosso^vwe sehszehen mut kernen geltes vnd von dem hof ze Mos sechs mut kernen geltes, vnd der kylchensatz halbe der kylchen ze Waltkylch, von dem gotzhus ze sant Gallen min vnd der êgenemten miner sún reht lîpding ist, vnd daz ich noch die êgenemten min sún noch v´nser erben noch ieman von v´nseren wegen zů dem vorgeschribenen gelt noch zů dem vorgeschribenen kylchensatz halbem enhain ander reht ansprâch noch vordrung niemer haben noch sprechen súllent, won daz ez min vnd der êgenemten miner súne reht lîpding sie, als der brief v^s richt vnd bewist, der mir vnd minen êgenemten súnen vmb daz selb lîpding von dem êrwirdigen herren abt Georien abt vnd dem cappittel dez gotzhus ze sant Gallen geben ist, der selb brief von wort ze wort also geschriben stât:||
Es folgt der Text von Nr. 4771.||
Vnd dez alles ze ainem wâren vrkúnde vnd gantzzer sicherhait so han ich der êgenemt Burkart von Ramswâg min insigel gehenkt an disen brief fúr mich vnd die vorbenemten min sún. Der geben ist ze sant Gallen an der na^ehsten mitwuchen nach sant Andres tag dez zwelfbotten, o^vch in dem jâr, do man zalt von gottes gebúrt drúzehenhundert jar vnd darnâch in dem ain vnd sehszigosten jâre.

Source Fulltext: Chartularium Sangallense VII, Nr. 4772, S. 577-578.